KOHIMA, OCTOBER 16 : 4th Battalion NAP kan 15th October 2018, Durbar Hall, Thizama te tai 50 sal hua Golden Jubilee manaise. Etu din te Nagaland DGP, T. John Longkumer, IPS toh Special Guest nemite ahese koise.
Etu 4th Battalion NAP toh ahkete 1968 sal te ula laga ase. Etubi Headquarters toh Longnak jaka te. Aro etu Battalion laga kanoon kan toh Assam Border jaka te porahi julabole kurikena thakise koise. Etu Battalion porabi ekdam bhal kam kan kuride kena thaka laga ase. Etu ke Merapani chamala hua time te bi etu Battalion porahi sabole kurikena thakise koise. Aro etu chamala time te besi jun Officers aro moda kan mura bi muri kena etu chamala te chakara kurikena thaka laga ase koise. Etu bejete etu Battalion laga Headquarters toh Thizama te 1972 sal phale anediya laga ase. Aro etu Battalion Unit kan bi UP aro Delhi jaka te bi kam julai kena thaka laga ase koise.
Etu din te kotha kurikena T. John Longkumer porabi etu 4th NAP kan ke salam diya aro khushi kotha kan janaide thakise. Aro Commandant, 4th Bn. NAP Thizama, Teisovise Metha, NPS porabi etu Battalion kan kinika suru pora edia dak bhal te thaki kena 50 sal huijaise etu kan laga bhal kotha janaide koise. Ahkete Regimental School, 4th battalion, NAP Thizama laga Students kan pora Welcome gaana kuridese. ABI, Keviphilie Theunüo pora Traditional gaana kuridese. Dy. Commandant, T. Denyong Konyak, NPS pora Vote of Thanks janaidese. Aro etu din laga Programme toh Dy. Commandant 2 i/c, Vesupra Kezo, NPS pora ahkete luijaide kena manaidese. Aro last te etu Programme khotum kuridiya toh DGP band. Pora Special Number kuride kena khotum kuridese koise. Etu oporte etu Golden Jubilee laga naam pora Pathor te kotha lekhe kena thaka (Monolith) bi DGP pora lakaidese. Etubi Officers aro Dignitaries kan bi thaka majutte. Aro Nizopre Ritse, Pastor, Unit Church pora etu Pathor laka time te prathana kuridese kosie.
Add Comment