Agartala, August 4 : CPIM laga 3jun MLA para Tripura laga Chief Minister Dr Manik Saha ke Dengue- positive thaka case tu bari thaka laga opor chinta janaisey aro Sepahijala district laga Dhanpur Primary Hospital te doctor, nurse aro bimar laga emergency dhyan rakhibole train kora manu khan laga number tu barabole demand kurisey. Aro mochor net bhak kuribole aro dengue bimar pa marij khan laga ilaj kora laga khorcha bi uthabole demand kurisey.
Etu demand kora 3jun CPIM MLA Ramu Das, Sudip Sarkar aro Nayan Sarkar para CM Dr Saha ke diya letter te enaka likhisey ki aji(April 4 te) MLA Shyamal Chakraborty para lead kurikina taikhan tu Dhanpur Primary Hospital te jaisey aro dengue paikina thaka marij, doctor, nurse aro hospital laga alag staff khan ke kotha kurisey. Aro taikhan ke dengue laga ilaj chuli thaka marij khan ke ilaj diya laga aro hospital laga facility te ki problem asey etu bi huda hudi kurisey .
Taikhan para CM ke diya letter te enaka likhikina thakisey, “ Etu hospital te duty kuri thaka doctor para amikhan ke koisey ki July 13 para bimar thaka marij khan hospital te ahibole suru hoisey aro hodai din marij laga number tu bisi bisi bari asey. Aji kali hospital te hodai din 40 to 50 dengue positive thaka marij khan hospital tea hi asey.Aro koisey ki bisna laga number baraidiya pichetey bi mamla tu thik huwanai. Etu opor te hospital te sob kisim laga staff jaiseki nurse,bimar manu khan ke emergency te sai diya manu , ward boys, safa safi kora manu khan laga kami asey. Etya tu etu hospital te nutun marij khan ke admit kuribole laga bisi komti jaga asey. Etya Dhanpur Primary Hospital te pura puri 3ta doctor asey kuntu majotey ekjun doctor tu olop din agey te hey etu hospital join kurisey. Aro koisey ki ekta doctor ekla para 5ta nurse logotey milikina eman bisi marij ke pura din aro rati seva kuribole naparibo.”
Etu letter te agey barikina enaka likhikina thakisey ki MLA khan para etu hospital te ja homoitey kunba manu khan para taikhan laga bhabna tu share kurisey.
Etu manu khan para koisey ki dengue para affect huwa pura area te ekta bhoi laga mohol hoijaisey.
Etu MLA khan para hospital laga marij aro doctor, nurse aro alag staff khan ke biswas dilaisey ki taikhan para sarkar laga dhyan ke etu problem khan thik kuribole aro hospital laga subidha tu barabole nimitey tanibo.
Taikhan para rajya laga sarkar ke etu halat laga samna kuribole nimitey joldi kadam uthabole request kurisey.
CPIM MLA khan para Dhanpur Primary Hospital laga pura puri facility ke improve kuribole demand kurisey, khas kurikina doctor, nurse aro marij khan ke sa staff khan laga number barabole, garib parivar khan ke logalog mochor net bhag kuribole aro dengue laga khilaf te samaj te jankari dibole koisey. Taikhan para etu bi koisey ki dengue bimari feilikina thaka jaga te ghor ghor jaikina khoon laga sample jama kuribo lagey aro dengue positive thaka marij khan ke test kora pichetey hospital te anibo lagey, sarkar para taikhan laga ilaj laga sob khorcha uthabo lagey aro bimari feilikina thaka area ke mochor laga dawai para spray kuribo lagey.
Add Comment