Khobor pa hisap te, Rahul Gandhi tu Mizoram te dui din nimitey thakibole asey .
Media ke kotha kurikina, AICC Media Coordinator & Mizoram Incharge, Mathew Anthony para koisey, “ Rahul Gandhi tu 16-18 October te, Mizoram ke visit kuribole bisi khusi asey. October 16 te, Rahul Gandhi para Mizoram laga manu khan logotey Chandmari junction para Treasury Bhawan tak baat chit kurikina berabole asey aro desh aro Mizoram rajya te agey loijabole nimitey morom, shanti aro secularism laga message feilabole asey.”
Agey barikina etu AICC leader para etu bi dawa kurisey ki Rahul Gandhi tu October 18, 2023 te phujur fale Aizawl Press Club te ekta press conference meeting attend kora picheyte Delhi te wapas ahijabole asey.
Etu homoitey, sob laga monjuri para luwa ekta faisla te, Central Young Mizo Association (CYMA) kun para Mizoram laga alag alag rajneetik party, student group aro NGO ke represent korey etu para Election Comission of India (ECI) ke ahibole thaka Mizoram State Assembly election laga vote ginti kora din tu December 3 (Sunday) para bodli kurikina alag din te rakhibole kosiey.
Mizoram community laga side para Mizoram laga dangor rajneetik party khan jaiseki AAP, BJP, MNF, MPCC,PC, ZNP aro ZPM para CYMA, MUP, MHIP, MSU aro MZP nisna dangor NGO khan logotey milikina ekta letter te sign kurikina Chief Election Commissioner, Shri Rajiv Kumar ke pathaidisey.
Etu letter te Mizoram kotey 90% manu Christian asey etu jaga te Sunday din laga dhormic aro cultural impotance janaisey. Mizoram laga manu khan nimitey Sunday tu ekta pavitra din asey etu nimitey taikhan para etu din ke khali Isor laga worship kuribole nimitey rakhibole jaruri asey. Mizoram te Sunday din te eku official program nohoile business laga kaam khan nokorey.
Add Comment