Imphal, October 27 : Manipur te thaka ekta fast track court para ekjun 36 years laga manu ke ekjun 10 saal laga chukri logotey letra kaam kora nimitey 10 saal jail te dukh paikina thakibole laga sajai hunaisey.
Etu mujrim ke IPC laga Section 366 aro Protection Of Children from Sexual Offences (POSCO) Act, 2012 laga Section 4 bhitor te doshi paisey.
Special Judge Fast Track Special Court Number I para bi etu mujrim Konthoujam Robindro ke Rs 5000 laga fine impose kurisey. Tai tu Manipur laga Bishnupur district laga manu asey.
Etu case tu June 6, 2018 laga asey jitya etu hatsa laga sikar huwa chukri laga ama para Bishnupur Women’s Police Station te Robindro para tailaga chukri logotey June 4 te galat harkat kurisey koikina ekta complaint file kurisey.
Etu court para Thursday din te mujrim para kanooni custody te 6 moina aro 20 din bita laga homoi tu tailaga total sajai laga homioi para katikina adjust kuribole order disey.
Court para agey barikina Manipur Government Victim Compensation Fund nohoilebi alag scheme khan laga under te etu chukri ke Rs 1 lakh dibole koisey.
Bishnupur police station laga investigating officer para IPC laga Section 366-A aro POSCO Act laga Section 4 laga under te etu mujrim laga against te ekta charge sheet submit kurisey.
Etu Court para hearing kora homoitey etu dikhisey ki prosecution para mujrim laga khilaf te iljam laga tu prove kuribole kamyab hoisey aro enaka kurikina etu mujrim ke IPC laga Section 366-A aro POSCO Act (chutu baccha khan ke Sexual Assault kora) laga Section 4 te doshi manikina faisla hunaisey.
Add Comment