Guwahati, October 30 : Ekta asurit kuridiya ghotna te, ekta train te ekjun Bihar police constable para Assam laga kunba maiki khan ke cher-char kurisey.
Etu chukri khan tu Biswanath College laga 14 maiki student laga group laga hisa thakisey kun khan Delhi aro Rajasthan te educational trip nimitey jaisey. Etu ghotna tu taikhan Kishanganj railway station laga osor te North East Express para wapas ahithaka homoitey hoisey.
Etu student khan para iljam laga hisap te, Naveen Kumar Singh koikina ekjun Bihar police constable para kunba maiki student khan ke taikhan ghumai thaka homoitey cher-char kurisey. Jitya etu chukri khan achanak para uthikina jur para hala kurisey aro kandisey etu constable ke tatey buhi thaka passenger khan para jag ate dhurisey.
Jitya railway official khan ke etu mamla report kurisey, etu student khan ke Kishanganj railway station te train para namibole koisey aro etu constable laga against te eku action luwanai.
Etu laga khilaf te jaikina etu chukri student khan para New Jalpaiguri railway station te namibole faisla kurisey. Taikhan para etu constable ke railway police laga haath te dibole laga irada para taikhan logotey dhurikina rakhisey.
Hoilebi New Jalpaiguri railway station te aro ekta asurit kuridiya ghotna hoisey. 50 railway police laga ekta group para etu 5jun maiki student ke charo taraf para gherisey aro taikhan ke custody te loijabole kosis kurisey. Railway police para etu student khan ke etu police constable ke taikhan logotey illegal para dhurikina rakha laga iljam lagaisey.
Hoilebi, picheyte etu railway police official khan para akhirkar etu student khan para iljam lagai thaka tu hunisey aro New Jalpaiguri railway Police station te etu police constable laga against te complaint file kurisey.
Khobor pa hispa te, etu student khan para Rajdhani Express te Guwahati pungcibole laga journey suru kurisey.
Etu bich te, Biswanath College laga principal, Dr Chintamani Sharma para etu case te mujrim laga against te strict action lobole demand kurisey.
Add Comment