New Delhi, November 8 : Wednesday(November 8) laga phujur te, West Bengal laga Bankura district te, ekjun BJP leader laga dead body gaas te hang kurikina thaka paisey. Etu picheyte, BJP para etu BJP leader laga khoon huwa mamla te West Bengal ke etya cholaithaka rajneetik party Trinamool Congress (TMC) laga member khan laga haath asey koikina iljam lagai asey aro etu mamla te CBI investigation kuribole demand kurisey.
BJP leader Subhadeep Mishra kun Deepu Mishra koikina bi jana jai, tailaga dead body tu Nidhirampur koikina ekta busti laga gaas te hang kurikina thaka paisey, tai para etu saal laga first fale BJP laga ticket te panchayat election te contest kurisiley.
Sources laga hisap te, Subhadeep para 7 din ageyte ghor charikina jaisey aro kotba alag jag ate thaka suru hoisey. Tai Tuesday din te ghor wapas ahisey. Aro Wednesday din laga phujur te, tailaga dead body gaas te hang kurikina thaka aro tailaga haath kapra para bandikina thaka paisey.
Local manu khan para kuwa hisap te, Subhadeep laga ekjun maiki logotey chakar chuli thakisey. Local manu khan para etu bi koisey ki taikey moraidiya laga picheyte tailaga parivar laga haath bi hobo parey.
Hoilebi, jitya police para etu maiki ke sawal kuribole nimitey loijabole kosis kurisey, local manu khan para protest kurikina police laga gari ke hamla kurisey.
Dusra fale BJP khan para iljam lagai asey ki Subhadeep mora laga picheyte rajneetik karon thakibo parey.
Add Comment