Itanagar, December 17 : Arunachal Pradesh laga Khonsa West jaga laga former(poila laga) MLA Yumsen Matey ke Tirap district te thaka India-Myanmar border osor te ekdam berehemi para marikina moraidisey. Arunachal laga Chief Minister Pema Khandu para enaka bhayanak harkat kora ke condemn kurikina ekdam bisi monduk pa tu jataisey. Aro etu moraidiya MLA laga parivar ke biswas dilaisey ki rajya laga sarkar tu enaka dukh laga homoitey taikhan logotey majboot para khara thakibole asey.
Chief Minister Pema Khandu para X(poila te twitter) te dhala ekta post te koisey, “Ami tu former MLA Yumsen Matey murija laga khobor hunikina bisi mon duk asey aro enaka bhayanak harkat kora ke kara para condemn kuri asey. Tailaga parivar ke monduk janai asey aro ami para biswas dilai asey ki rajya laga sarkar tu enaka dukh laga homoitey taikhan logotey majboot para khara hoikina asey.”
Etu ghotna tu December 16 te hoisey kitya Yumsen Matey ke Lazu circle te thaka Raho busti te huwa ekta social function para kidnap kurikina loijaisiley. Etu picheyte, kidnap kora manu khan para taikey border area te loijaisey, kotey tai tu bhitormanu laga haath para ekdam berehemi para murisey. Arunachal Pradesh Police ke investigation tu aro tej kuridibole koisey aro joldi se jurum kora manu khan ke sajai dibole koisey.
Yumsen Matey tu Tirap District laga OLLO community para asey aro tai tu Khonsa West para Arunachal Pradesh Assembly laga member hoikina seva kurisey. Tai tu OLLO community para first graduate huwa manu hoikina ekta etihas banaisey. Tai tu khali politics te hey nohoikina, Arunachal laga Changlang District te District Adult Education Officer (DAEO) hoikina bi seva kurisey.
Matey tu 2009 te, Indian National Congress laga ekta member hoikina 56th Khonsa West Assembly Constituency para MLA elect hoisiley. Matey tu Departments of Women and Social Welfare, Social Justice and Tribal Affairs aro DOTCL (Department of Tirap, Changlang aro Longding) te Parliamentary Secretary laga position dhuri thakisey.
Add Comment