Imphal, December 19 : Monday rati te, Manipur laga Churachandpur district laga Thingkangphi busti te group te ola jhagra te 30 manu jokhom khaisey. Aro District Magistrate para dui moina tak, February 18, 2024 tak etu gorom mamla ke samhalibole nimitey Cr. P.C 144 (2) lagu kurisey. Etu jankari tu ekta official source para Tuesday din te disey.
Duita jati, Kuki aro Zomi majotey jhgra tu titya olaisey jitya Zomi jati laga manu khan para Monday din laga rati 9:15 pm fale Churachandpur laga Thingkangphi busti te thaka ekta memorial stone te Zomi community laga ekta flag dhalibole kosis kurisey.
Etu jhamila ola laga report pa picheyte, Churachandpur district laga police aro Rapid Action Force tu jag ate pungchisey aro mamla ke samhalibole nimitey tear gas shell khulisey.
Hoilebi, etu jhagra te 4jun Zomi aro duijun Kuki manu jokhom khaisey. Tear gas shell firing te etu duita community para 25 manu bi jokhom paisey. Etu kotha tu police para koisey.
Jokhom pa manu khan ke Churachandpur district hospital te ilaj kuribole nimitey loijaisey.
Etu situation chuli thaka homoitey, Churachandpur district laga IAS District Magistrate, Dharun Kuma para section 144(2) CrPC 1973 laga under te December 18, 2023 para loikina 18 February 2024 tak dui moina nimitey ekta prohibitory order ailan kurisey.
Etu pura area tu Churachandpur district laga under te asey khas kurikina Thingkangphi busti aro etu logotey join hoikina thaka area khan.
Etu order para 5jun aro etu para bisi manu khan ke jama hobole para mana kurisey aro hathyar, lathi, talwar, chemical nohoile manu ke moraidibole para hathyar khan bi bukhibole para mana korey.
Etu order tu nyom aro kanoon ke palan kuribole diya agency aro jaruri service khan maintain kora agency khan te lagu nohobo.
Add Comment