Assam : Congress Lok Sabha ticket nimitey 47 aspirant

Guwahati, December 19 : Assam te etya tak pura puri 47 manu para aha saal hobole thaka Lok Sabha election te bhak lobole nimitey apply kurisey, hoilebi etu 47 manu majotey Congress party laga etya laga 3jun MP majotey ekjun bi nai.

2024 Lok Sabha election laga ticket nimitey rajneetik party laga member khan para application accept kora laga akhri tarik tu Tuesday din te khotom hoijaisey.

Assam te 14 Lok Sabha seat asey. Assam te etya mojud thaka 3jun Congress MP majotey, ekjun para form loisey hoilebi etu form tu submit koranai koikina Congress party laga ekta source para koisey.

Etu source para koisey, “Amikhan para etya tak bisi Lok Sabha seat nimitey 47 application paisey. Etu khan majotey, tatey Lok Sabha election te bhak lobole mon ja maiki khan bisi asey. “Barpeta laga MP Abdul Khaleque para tailaga application form tu Monday din te collect kurisey aro alag duijun MP- Nagaon laga Pradyut Bordoloi aro Kaliabor laga Gaurav Gogoi khan tu taikhan laga paper lobole baki asey.”

Tai para koisey ki application accept kora laga akhri tarik tu aro baraidbo parey.

Tai para koisey, “ Ekta Parliament session chuli thaka nimitey application accept kora laga homoi tu aro baraidibole nisna asey.”

Assam Pradesh Congress Committee (APCC) para etu moina first fale ekta circular issue kora hisap te, fill kora form khan accept kora laga process tu December 11 te suru hoisey aro sob apply kora manu khan para Rs 1 lakh deposit kuribole lagisey. Congress party para koisey ki Congress tu Assam te 2024 Lok Sabha election ekey logotey laribole aim kora 15-member opposition forum laga ekta hisa huwa nimitey, taikhan para kunba jaga para candidate ke election te bhak lobole dibole para rokhabo lagibo.

Etu circular te koisey ki application submit kora manu khan laga fees tu wapas didibo.

Assam te 15-party United Opposition Forum Assam (UOFA) ke Indian National Developmental Inclusive Alliance (INDIA) nisna banaisey.

United Opposition Forum Assam (UOFA) alliance majotey AJP, Raijor Dal, CPI(M), CPI, Jatiya Dal-Asom, NCP, RJD, Janata Dal (U), TMC, CPI(ML) aro AAP khan asey. Taikhan para olod din ageyte Lok Sabha election te cholabole thaka strategies nimitey dui din laga private meeting rakhisey.