Guwahati, December 19 : Northeast laga 6ta rajya Arunachal Pradesh, Assam, Nagaland, Sikkim, Tripura aro Manipur te class 10 te school charikina ja student khan laga rate tu bisi komti huwa dikhi asey.
Union Minister of Education, Dharmendra Pradhan para data diya para dikhaisey ki 6ta Northeast rajya para juwa 4 saal te Class 10 te student khan school charikina ja rate te improvement aha dikhaisey. Aro 2021-22 te Manipur te Class 10 te school chara student laga rate 0% (ekta bi nathakikina) dangor improvement aha dikhaisey.
Pradhan para alag alag rajya majotey Class 10 te school charikina ja student laga rate laga details tu Lok Sabha session chuli thaka homoitey disey. Aro etu te Northeast laga 6ta rajya para bisi dangor improvement dikhaisey.
Aro etu 6ta Northeast rajya majotey Manipur para sobsey dangor improvement dikhaisey. Mnaipur te 2020-21 majotey school charikina ja rate tu 16.2% thakisey aro 2021-2022 majotey 0% hoijaisey.
Etu kamyabi hasil kora laga kotha kurikina Mnaipur Chief Minister N Biren Singh para koisey ki etu laga karon tu 2019 te duita dangor initiative, School Fagathansi aro Lairak Tamhanlasi launch kora nimitey asey.
Dusra fale Arunachal Pradesh laga 2021-22 te drop out rate 17% thakisey. Etu laga agey 2020-21 te 19.9% thakisey. Assam te 2021-22 te 28.3% hoisey, etu ageyte 2020-21 te 47% thakisey. Nagaland te 2021-2022 te 23.4% hoisey etu agey te 2020-2021 te 27.2% thakisey. Sikkim te tu 2021-22 te 10.1% hoisey etu ageyte 2020-2021 te 12.7% thakisey.
Aro akhir te, 2021-22 te Tripura te 3.8% hoisey etu laga ageyte 2020-21 te 26.9% thakisey. Kuntu tu bisi dangor improvement asey.
Add Comment