Guwahati, December 27 : Bharat Jodo Yatra kamyab huwa picheyte Congress neta Rahul Gandhi para announce kurisey ki tai para Bharat Nyay Yatra suru kuribole asey.
Bharat Jodo Yatra tu India laga South fale para suru kurikina North fale khotom kurisey. Etu nisna Bharat Nyay Yatra tu India laga east fale para suru hoikina west fale khotom hobole asey.
Congress neta Rahul Gandhi laga Bharat Nyay Yatra tu January 14 te Manipur laga Imphal seher para suru hobo aro March 20 te Mumbai te khotom hobo.
Etu Bharat Nyay Yatra chuli thaka homoitey, Rahul Gandhi tu desh laga alag alag group laga manu khan jaiseki youth, maiki aro samaj para alag thaka community khan ke lok kuribole asey.
Etu Bharat Nyay Yatra te 14 rajya paar kurikina berabole asey, kuntu te northeast laga 4ta rajya – Manipur, Nagaland, Assam aro Meghalaya shamil asey.
Alag 10ta rajya tu West Bengal, Jharkhand, Odisha, Chhattisgarh, Uttar Pradesh, Madhya Pradesh, Rajasthan, Gujarat aro Maharashtra asey.
Etu yatra te India laga 14 rajya laga 85 district cover kuribole asey.
Congress leader KC Venugopal para koisey, “ Bharat Nyay Yatra tu Manipur para Mumbai tak January 14 para suru hoikina March 20 tak jabole asey.”
Tai para koisey ki etu yatra te taikhan 6200 kilometre cover kuribole asey. Etu baar laga yatra tu bus te buhikina kuribole asey aro congress neta khan tu kunba hisa laga rasta khan te berabole nisna asey.
Tai para agey barikina koisey ki Congress worker khan para Rahul Gandhi ke etu Yatra tu East para suru kurikina West tak jabole suggest kurisey. Aro Rahul Gandhi para bi manisey.
Add Comment