Assam : 500kg shim(lablab beans), 5000 limbu London te supply kurisey

Guwahati, December 27 : December 27 te Assam para 5000 maan limbu aro 500 kg shim(lablab beans) London te supply kurisey.

Etu saman khan London te patha homoitey, Assam laga agriculture minister Atul Bora para online te flag-off ceremony attend kurisey. Etu supply para dusra desh laga market te, Assam laga mojudgi bara tu dikhaisey.

Etu lablab beans(shim) khan tu Assam laga Sivasagar district laga Nitaipukhri jag ate thaka Dihingoaria FPC laga kheti kora manu khan para ugaisiley. Aro etu special quality laga limbo khan tu Tinsukia district te ugaisiley. 

Social media platform X te Atul Bora para koisey ki etya Assam laga kisan khan tu Chief Minister Himanta Biswa Sarma laga leadership under te foreign market te gusibole pari asey. 

Bora para enaka koisey, “ Assam laga Chief Minister Dr Himanta Biswa Sarma laga strong leadership under te, Assam laga kisan khan dusra desh laga market te gusibole parisey. Amikhan tu pura biswas asey ki ahibole homoitey enaka saman khan dusra desh te supply kurikina amikhan para CM Himanta Biswa Sarma laga visionary leadership laga under te Assam laga agricultural economy te ekta nutun bodli anibole paribo.