Shillong, January 5 : Meghalaya cabinet minister Paul Lyngdoh para Friday (January 05) te Shillong te media khan ke kotha kuri thaka homoitey koisey ki Meghalaya laga Hynniewtrep National Liberation Council (HNLC) para taikhan laga leader ke maafi dibole laga demand kora te serious bhabna chuli asey aro etu demand tu pura kuridibole nisna asey.
Agey barikina, Meghalaya laga sarkar para HNLC ke taikhan shanti laga baat chit kora para hatijabole laga faisla kora te aro ekbar bhabna kuribole request kurisey.
Etu mamla te kotha kurikina, Meghalaya minister Paul Lyngdoh para koisey ki rajya laga sarkar tu etu mamla ke active para address kuri asey.
Tai para enaka koisey, “ Amikhan para etu report khan tu media te hey dikhisey; taikhan ke officially kotha kranai,”
Hoilebi, Meghalaya minister para HNLC ke peace talk(shanty anibole nimitey baat chit kora) para hatikina najabole request kurisey.
Tai para koisey ki bisi mamla ke etu akha kurikina cover kurisey ki duita side(sarkar aro HNLC) para shanty banabole laga baat chit kora te active para bhag lobo aro ekta natija te pungcibo.
Ageyte, ban hoikina thaka Meghalaya laga Hynniewtrep National Liberation Council (HNLC) tu Central aro Mizoram sarkar logotey shanty laga baat chit kora para hatijaisiley.
HNLC laga Chairman Bobby Marwein aro general secretary Sainkupar Nongtraw para ministry of home affairs (MHA) te patha ekta letter te koisey, “Amikhan para apni khan ke apsoos hoikina etu janai asey ki amikhan tu kuribole mon najaikina apni laga sarkar logotey kora peace talks para hatijai asey.”
Etu letter, kunu December 31, 2023 te likhisiley etu ke Northeast laga side para MHA laga advisor, AK Mishra laga through para Ministry of Home Affairs (MHA) ke patahisiley.
HNLC para koisey ki taikhan para peace talk para olaijabole laga faisla luwa tu taikhan laga demand pura nokora nimitey asey.
HNLC laga leader khan para koisey ki taikhan laga etu demand ke pura nokora laga matlab tu taikhan laga political demand ke bi pura nukurikina nazarandaz kuridibo.
Add Comment