ULFA-I logotey jhamila barithaka homoitey Assam DGP para youth khan ke warning disey

Guwahati, January 10 : Assam laga director general of police (DGP) GP Singh para ULFA-I logotey jhamila bari thaka homoitey rajya laga youth khan ke ekta warning issue kurisey. 

Assam laga DGP GP Singh para rajya laga youth khan ke ban hoikina thaka atangwadi group ULFA-I para manu khan ke kaam te dhala laga drive khan laga sikar nohobole warning disey,

Assam laga DGP para aha warning te thik nathaka ULFA-I camp te boha manu khan ke enaka khatarnak jaga te thakikina taikhan laga suraksa ke khatra te dhala bodli suraksit jaga te jaikina buhibole advise disey.

Ajikali ULFA-I aro Assam sarkar, police aro alag security forces khan majotey jhamila barijai asey.

Olop din ageyte,  Myanmar te United Liberation Front of Assam-Independent (ULFA-I) laga komsikom ekta camp te drone attack hoisey.

Etu camp bi utu camp khan laga majotey asey kuntu toh India bhitor te cross-border operation  kora laga adda asey aro etu camp te ULFA-I te bhorti kora manu khan ke thakibole jaga aro training diye.

ULFA-I para dawa kurisey ki taikhan laga Myanmar te thaka camp te drone laga hamla huwa tu Indian Army para kora laga asey.

ULFA-I laga hisap te, etu drone khan ke Arunachal Pradesh laga taraf para hamla kuribole patha laga asey. 

Hamla kuribole nimitey purapuri tinta drone pathaisiley.

First drone attack tu phujur laga 4:10 am, second drone attack tu 4:12 am aro third wala tu 4:20 am te kurisiley.

Etu tinta drone majotey first duita drone tu target kora jaga te girikina phutisey  hoilebi third wala drone tu phutanai.

Etu hamla te ULFA-I laga duijun manu jokhom hoisey.

ULFA-I para koisey ki enaka kadam uthaikina judi India laga rajya khan para taikhan laga idea aro bhabna kora tarika khan ke dur felabole mon asey koiley taikhan tu galat akha aro bhabna kuri asey.

Etu janibo lagey ki Paresh Baruah para chola ULFA-I para shanti laga baat-chit kora te join kuribole mana kuridiya picheyte India laga sarkar aro Assam laga sarkar laga ULFA-I logotey dushmani barijaisey. 

Paresh Baruah para etu safa safi koidisey ki  ULFA-I para tabtak shanti laga baat-chit kora te join nukuribo jaabtak Assam laga sovereignty laga mamla tu discussion nimitey table ten a anibo.