Agartala, January 15 : National Liberation Front of Tripura (NLFT) PD group laga 5jun atangwadi para Monday din te Agartala te hathyar logotey nijor ke surrender kuridisey.
Ekta press statement te, Tripura Police AIG Law and Order para koisey ki 5jun NLFT (PD group) atangwadi khan tu 33 years laga Netajoy Reang(dusra naam Naising), 36 years laga Mohonda Reang (dusra naam Salthang), 27 years laga Sukumar Reang (dusra naam Sinai), 20 years laga Kiranjit Reang (dusra naam Berem) aro 26 years laga Bishnuram Reang(dusra naam Baikang) asey taikhan para surrender kurisey. Aro taikhan sob bi Tripura laga North district para asey.
Aro koisey ki etu manu khan para khoon kharaba laga rasta charidibole, Bangladesh te thaka taikhan laga luka jaga para bahar olaikina India laga side fale ahibole aro asli jibon ke join kuribole chunisey aro Agartala laga SB Heard Quarter laga DIGP(Intelligence) Krishnendu Chakravertty laga samne te Tripura police laga ageyte surrender kurisey.
Police para agey barikina janaisey ki etu atangwadi khan para ekta Chinese Pistol, duita China te bana rifle, 17 live rounds, ekta 70 mm short gun shell- 10(ten), charging port logotey thaka ekta Walkie-talkie, 770 taka Bangladeshi poisa, duita Bangladeshi mobile SIM card, 5ta dhomkidikina poisa manga laga notice aro 5ta dhomki dikina poisa luwa laga receipt bi surrender kuridisey.
NLFT(PD) laga etu group tu India-Bangladesh border par kurikina Bangladesh fale bisi active asey. Etya tak Tripura police aro security forces majotey NLFT laga 26 active member para surrender kurisey. Etu homoitey Tripura police para NLFT laga 8jun manu ke arrest kurisey. Aro Monday din te 05 manu surrender kora logotey, Tripura tu rajya ke atangwad para mukt kuribole laga kosis te aro ek kadam agey barisey.
