Guwahati, January 29 : Citizenship Amendment Act (CAA) logotey jurikina thaka jhamila tu gorom hoijaisey, Monday(January 29) te Guwahati laga Chachal jaga te Assam Jatiyatabadi Yuva Chhatra Parishad (AJYCP) para ekta dangor protest rakhisey.
Etu Assam student body para Monday din te protest kurikina banner utha homoitey announce kurisey ki taikhan para kuntu halat te bi rajya te CAA swikar nukuribo. Bisi AJYCP member khan para Chachal jaga laga ekta jag ate protest kurisey aro announce kurisey ki judi CAA laga kanoon ke nahataisey koiley pura rajya te dangor protest hobo.
Protest kora manu khan para khas kurikina etu demand kurisey ki Assam te CAA implement kora bodli Centre para tatey Inner Line Permit (ILP) lagu kuribo lagey.
AJUCP president Palash Changmai para koisey ki kuntu halat te bi Assam te CAA implement hobole nidibo. Etu laga bodli amikhan ke Assam te ILP lagu hobole dibo mon nai.
Changmai para koisey, “CAA ke loikina AJYCP khara huwa tu ekdam clear asey. Amikhan tu amikhan laga stand para hatibole nohoi. Amikhan tu hilibole nohoi. Amikhan para Assam te CAA implement hobole nidibo. Etu laga bodli amikhan para Assam te ILP joldi lagu hobole dibole mon asey.”
CAA laga mamla tu Union Minister Shantanu Thakur para West Bengal te CAA tu 7din bhitor te implement hobo koikina announce kora picheyte gorom hoijaisey.
Changmai para Union Minister laga etu statement tu nyom hisap te nohoi koisey. CAA ke Indian Parliament para 2020 te pass kurisiley. Etu kanoon ke bana laga maksat tu December 31, 2024 ageyte Afghanistan, Pakistan aro Bangladesh para India te aha non-muslim manu khan ke citizenship dibole laga asey. Etu kanoon tu khas kurikina Hindu, Sikh, Buddhist, Jain, Parsis aro Christian khan ke modod dibole laga maksat para bana asey kun khan para nijor laga desh te dhorom ke loikina dukh diktar jhelibole lagisey.
