Guwahati, January 31 : January 2024 te, Assam sarkar para National Food Security Act (NFSA) laga under te aro 42 lakh beneficiary ke free ration card dikina food security ke improve kuribole nimitey ekta dangor kadam uthaisey.
Beneficiary khan baraidiya laga kaam tu Chief Minister Himanta Biswa Sarma para tailaga constituency, Jalukbari te inaugurate kora laga asey.
Tailaga X hadle te, Assam CM Himanta Biswa para enaka likhisey, “January tu Assam laga manu khan nimitey ekta khas moina hoisey. 42 lakh opor manu para rajya te Ration Card distribution programme laga through para free ration, free healthcare paisey. Amikhan tu ration card ke ekta Laxman Rekha nisna sai asey kuntu para ghor khan ke garibi te fasibole nidibo. 2026 tak te, amikhan para sob ration card dhora manu khan ke Orunodoi scheme laga under te anibole aim kuri asey. Etu moina te amikhan para Anna Sewa se Jan Sewa effort laga under te ration free para bhak kora laga maksat hasil kurisey. 1.2 lakh Million Town chawl tu 60 lakh manu tak pungchisey.”
Etu ration card bhak kora event tu rajya para sob manu ke sufficient khana dibole mehnat kora te ekta jaruri moment mark kurisey.
Nutun ration card pa sob family member tu hodai moina poisa nidikina 5kg chawl pabo. Etu provision tu “anna sewa saptah” laga ekta hisa asey . Etu tu enaka period asey kuntu homoitey etu benefit khan available asey. Aro January laga moina nimitey etu laga deadline tu January 31 tak rakhisey.
Etu nutun beneficiary khan ke shamil kora para Assam te extra 10,73,479 ghor te NFSA laga pohonch barabole akha kuri asey.
Etu initiative para khali food security ekla nohoikina health coverage bi dibole aim kuri asey, Aro etu beneficiary khan tu rajya bhitor te thaka government hospital aro nursing home te Rs 5 lakh laga health coverage pabole asey.
