Guwahati, February 05 : Monday din te Assam Legislative Assembly Budget Session tu hangama hoikina suru hoisey. Kilemaney Assam laga Governor Gulab Chand Kataria laga inauguration address ke opposition party laga member khan uthikina jaija nimitey khali 1 minute aro 20 second picheyte achanak se khata kuridisey.
Opposition member khan para Governor Gulad Chand Kataria laga bhasan ke khusi napaikina walkout kurisey.
Etu Budget Session tu February 28 tak chulibole asey.
MLA Rakibul Hussain para media ke kotha kurikina koisey ki taikhan tu Governor laga bhasan logotey khusi napaikina asey kileymane etu bhasan te Assam laga mamla nohoilebi problem khan ke cover koranai.
Hussain para dawa kurisey ki sarkar para opposition khan ke dabaikina rakhibole nimitey police laga galat istamal kuri asey.
Tai para koisey ki etu bhasan te jaruri mamla khan discuss koranai.
Opposition laga leader, Debabrata Saikia para koisey ki sarkar para development laga kotha korey hoilebi etu ke sabit kuribole nimitey thik thak information nai.
Tai para koisey, “Sarkar para kanoon aro beybosta laga mamla te bi eku kotha koranai. Amikhan ke Governor para bhasan dibole thaka laga copy diyanai.”
Saikia para koisey ki Governor laga bhasan te rajya te development aniya laga mention kurikina asey. Hoilebi etu development tu rajya laga manu khan ke dukh diktar te rakhikina hey kora asey.
Tai para agey barikina koisey ki sarkar para Sub Inspector (SI) Junmoni Rabha ke bi nyay dilabole paranai.
Assam Legislative Assembly laga Budget Session tu Monday din te Guwahati te suru hoisey.
Finance Minister Ajanta Neog para February 12 te fiscal saal 2024-25 nimitey state budget present kuribole asey.
Tai para ekta “realistic” budget anibole kosom khaisey kuntu para rajya laga economic dorkar aro aim khan address kuribo.
Add Comment