Aizawl, February 07 : Lalngaihawmi koikina ekjun suku dikhibole napara maiki para Mizoram Civil Service laga first suku dikhibole napara MCS officer hoikina etihas banaisey. Tai para etu dangor kamyabi tu eku coaching noloikina hasil kurisey.
Tai laga suku tu tai 17 years thaka homoitey biya hoijaisey. Etu para tailaga dimagi halat te dangor asar kurisey. Aro etu picheyte tai tu hope charidikina dui saal nimitey studies charidisiley. Hoilebi, tai tu wapas khara hoikina determination aro bahaduri laga ekta example hoisey.
MCS exam laga tayari kora tu tai nimitey sobsey bisi muskil aro ekdam mehnat lagiya laga kaam thakisey. Suku dikhibole napara nimitey, tai tu study materials(lesson khan) ke hunikina sikhibole nimitey audio format te convert kurisey. Etu kaam tu ekdam bisi muskil thakisey ki etu nimitey bisi bar tailaga suku pani girisey.
Jitya taikey youth khan ke message dibole koiseyy, tai para dukh laga homoi ke bhoi nakhabole koisey kilemaney etu homoi khan tu temporary asey hoilebi success tu lamba homoi tak lasting thakey.
Wednesday din te, Persons with DisabilitiesOffice laga Commissioner para Mizoram Combined Competitive Examination 2023 te first time PwD Quota successful para clear kora 3jun candidate ke somman dibole nimitey ekta event host kurisey. Etu event te Mizoram Journalist Association (MJA), Federation of Mizoram Disabled Organizations (FMDO) aro PwD Employees ke bhak lobole invite kurisey. Etu competitive exam khan clear kora 3jun successful candidate laga naam tu Lalngaihawmi (MCS), Lalremtluanga (MF&AS) aro N. Vahneichhi (MIS) asey.
Mizoram laga sarkar para gao te problem thaka jaiseki suku dikhibo napara, haath theng nathaka, hunibole napara manu khan nimitey komti hoilebi 4% tak sarkari job reserve kurikina rakhisey. Bisi manu khan tu PwD quota laga Group A, B, C aro D under te government job paisey. Etya, etu PwD quota laga through para government job te 90 opor manu naukri paikina asey.
Add Comment