Vice President Jagdeep Dhankar Monday te Mizoram Assembly te bhasan dibole

Aizawl, February 25 : India laga Vice President Jagdeep Dhankhar tu Monday din te Mizoram laga etya chuli thaka budget session te bhasan dibole asey. 

State Assembly Commissioner aro Secretary Vanlalthan para koisey ki etu Vice President para Aizawl laga western outskirt te Tanhril koikina ekta jag ate Mizoram University (MZU) laga convocation attend kora picheyte 12.45 am fale Assembly House te bhasan dibo.

Officer khan para koisey ki Dhankar tu Mizoram te Monday din te pungchibole asey. Aro tai tu MZU laga convocation attend kora picheyte aro assembly te bhasan diya picheyte Delhi te wapas ahibole asey.

Mizoram assembly ke address kora tai second Vice President hobole asey. Tai laga ageyte poila laga Vice President M Venkaiah Naidu bi Mizoram laga assembly house te bhasan disiley.

Naidu para Mizoram Assembly laga budget session tu March 10, 2022 te poila laga Chief Minister Zoramthanga laga under te Mizo National Front (MNF) para rajya ke cholai thaka homoitey address kurisiley.

Etya tak, Mizoram Assembly ke 3jun President- Dr APJ Abdul Kalam(September 2005 te), Ram Nath Kovind (November 2017 te) aro Droupadi Murmu (November 2022 te) para address kurisiley.

Vanlalthantlingi para koisey, Schedule laga hisap te, assembly session tu Monday te 10 :30 am te suru hobo. Aro Question Hour tu 10:30 am aro 11:30 am laga majotey hobole asey. 

Tai para koisey ki Taxation Minister Dr Vanlalthlana para ‘The Mizoram Goods and Service Tax (Amendment) Bill, 2024’ introduce kuribo.