Itanagar, February 28 : Arunachal Pradesh laga authority khan para 6jun Myanmar manu ke illegal tarika para international border par kora laga suspect te arrest kurisey.
Arunachal Pradesh laga Anjaw district te thaka Superintendent of Police, Riki Kamsi para report kurisey ki etu 6jun manu ke 6kg mushroom, borton aro 68,000 cash poisa logotey dhurisey.
Etu ghotna laga connection te, Arunachal Pradesh laga Hawai police station te ekta case register kurisey.
Police official khan laga hisap te, arrest huwa manu tu Myanmar laga Putou town laga manu asey aro tai tu India te bisi hapta nohoilebi moina para buhi asey.
Kamsi para samjhaisey ki etu Myanmar laga manu khan tu India te mushroom jama kuri kurikina gusisey. Enaka rasta cholaisey kuntu ke Indian army para border patrolling kuribole nimitey cholai.
First Information Report (FIR) te koisey ki etu arrest te, 7jun Myanmar manu shamil asey, kun khan ke alag alag busti te rare jari buti, ghas aro mushroom lobole aro jungle janwar laga sikar kuribole nimitey camping kuri thaka dhurisey.
Indian Army ke khobor di disey, aro Strategic Intelligence Branch (SIB) logotey ekta joint interrogation (huda hudi) kurisey.
Etu investigation tu taikhan laga camp laga location janibole aro etu area te baki khan bi mojud asey na nai etu janibole laga aim para kurisey.
Add Comment