Imphal, March 11 : Manipur te development ke ekta dangor boost diya te, Government of India, Ministry of Home Affairs, NE Division laga under te Imphal para Ukhrul tak aro Ukhrul para Imphal tak Monday din te ekta North East Division Helicopter Subsidy scheme chalu kurisey.
Etu scheme launch kurikina, Manipur Chief Minister N Biren Singh para koisey, “Etu helicopter service para duita district- Ukhrul aro Imphal te eku diktar nohoikina aha juwa kuribole bisi dangor modod kuribo.”
Tai para koisey ki Manipur laga government tu infrastructure(rasta, building khan) develop kora, connectivity, ilaj aro education laga mamla te inclusive(soblaga) growth kuribole laga goal ke pura kuribole committed asey.
Imphal para Ukhrul tak aro Ukhrul para Imphal tak aha juwa kuribole nimitey khali 35 minute hi lagibo.
CM para koisey ki Centre para already thaka helicopter subsidy scheme under te Imphal para dusra district headquarter tak nimitey ekta nutun Helicopter service route introduce nohoilebi cholabole karney jaruri approval mangisey.
Hoilebi, tai para etu district headquarter laga naam khan kuwanai.
Etu bhara tu ekjun manu nimitey per trip Rs 2,500 asey.
Centre para rajya laga government employee khan nimitey 75% aro 25% laga subsidy disey.
