Regional

Assam MLA Bharat Narah para Congress charidisey

March 26, 2024
16 Views

Guwahati, March 25  : Congress party laga Assam unit tu Lok Sabha election ageyte bisi jhatka khai asey.

Monday(March 25) te, Assam laga Lakhimpur district laga Nowboicha jaga ke represent kora member of legislative assembly (MLA) Bharat Chandra Narah para Congress party charidisey. 

Assam Congress ke aro ekta dangor jhatka  diya laga mamla te, Bharat Chandra Narah  para etu party laga primary membership nimitey tailaga resignation submit kurisey.

Etu kadam tu Narah para ageyte Congress party laga media cell laga chairman post para resign kora picheyte uthaisey aro enaka kurikina party  bhitor te buja buji nathaka hoija tu  barithaka tu dikhaisey.

Congress party laga national president Mallikarjun Kharge ke ekta khata resignation letter path ate, Narah para etu party charidible laga tailaga faisla janaisey.

Etu faisla tu party para Narah laga maiki, Ranee Narah ke Assam laga Lakhimpur parliamentary constituency nimitey nominate kuribole nakmayab huwa para olaisey.

Ranee Narah tu Congress para lead kora UPA 2 government laga homoitey former member of parliament (MP) aro ekta union minister thakisey. Tailaga nomination race tu Uday Shankar Hazarika para loiloisey kun olop din ageyte BJP para Congress te join kurisey.

Narah para olop din ageyte hey Assam Congress Chief Bhupen Kumar Borah ke Delhi jabole ageyte tailaga resignation letter submit kurikina disappointment janaisiley. 

Etu laga bawajut bi, Narah para party laga bhalayi nimitey tailaga dedication reaffirm kurisey.

Etu mamla tu Congress laga mushkil ke barai asey, khas kurikina BJP ke oppose kora homoitey. Agey barikina etu para party laga electoral prospect ke muskil kuridi asey, khas kurikina Assam te.

Ranee Narah laga supporter khan para tailaga candidacy nimitey ekdam mon dikina advocate kurisey. Tailaga electoral success aro parliamentary experience laga etihas ke highlight kurisey.

Ranee tu poila laga two-time Lok Sabha MP aro one-time Rajya Sabha member thakisey. Tai para Lakhimpur seat tu akhri bar 2009 te secure kurisiley aro etu picheyte 2016 para 2022 tak Rajya Sabha te seva kurisey.