WOKHA, NOVEMBER 9 : Nagaland Governor, PB Acharya pora 3 din nemite Amur Falcon Conservation Week mana ahke din suru kuridese. Aro etu din toh Ashaa Village Polytechnic Institute te 8th November 2018 te pora suru huise koise.
Etu din te kotha kurikena Governor Acharya pora etu nesena din te ami kan besi bhal pora ahkete luijabole kuri ase. Etubi Eco-Tourism kan besi huijabole aro uthaidebole karne. Aro etu kan sob porabi ami kan laga Economic Development nemite besi bhal hobo aro motub hobole laga ase koi kena janaide thakise. Tai bi etu Amur Falcon Chiria toh etu jaka te besi ahejai ase. Etubi shant aro aram jaka hua karne. Ahkete toh manu kan jani-jani kena aro najani kena etu chiria muraide thakise. Huilebi Pangti manu, Church leaders, NGOs, Departments aro Stakeholders kan pora etu chiria namurai kena pachabole kura bejete hi etu chiria toh besi-besi huijai ase. Etu karne tai besi khushi baa aro salam diya janaide thakise.
Tai bi Tourism aro District Administration Department kan ke besi khushi baa janaise. Etubi etu jaka laga rasta kan sob banaidebole kura karne. Kele etu porahi International Tourist aro Domestic Tourist kan aram pora aro bhal te eku dukh nakuri ahe kena etu jaka Isor pora bana te thaki ase koi kena. Etu bejete Governor porabi Lothas community kan ke etu nesena bhal jaka Isor pora diya laga bhal kotha kan janaide thakise.
Secretary, Tourism, Mhabemo Yanthan pora toh etu din te Keynote kotha kurise. Aro tai etu kotha kurikena etu Programme manabole kura toh Tourism nemite ahkete luijabole karne ase koi kena janaise. Aro etu din te bi Short Speeches toh Advisor IT, Science & Technology, NRE Mmhonlumo Kikon, Chief Wildlife Nagaland, SP Tripathi, IFS aro Chairman, Panti Village Council, Jenithung Shitiri pora kuridese. Aro etu din suru kura laga Function toh Deputy Commissioner, Wokha, Dr. Manazir Jeelani Samoon, IAS pora ahkete luijaide kena manaidese koise.
Add Comment