Pughoboto, March 13, 2025: Organic farming ke support kuribole aro local farmers (kheti-bari kora manu) ke kheti laga saman (jaiseki sobji, chawal khan) keheti para loijaibole aro store kuribole modod kuribole nimitey, Dr. Sukhato A Sema, 13 A/C Pughoboto laga MLA para Pughoboto Organic Farmer Producer Company Limited (FPC) nimitey ekta saman khan loijabole laga gari officially launch kurisey. Etu event tu Pughoboto Town laga VDB Hall te hoisiley.
Etu event ke Mr. Tiameren Chang, ADC Pughoboto, Mr. Kitoho Michael Swu, SDAO Pughoboto, COLKS laga representative aro FPC laga representative khan para attend kurisey. Taikhan sob para local farmer laga jibon ke behtar banabole nimitey etu inititive luwa tu kiman jaruri asey etu recognize kurisey.
Speech diya homoitey, Dr. Sukhato A Sema para Chief Minister aro Agriculture Department laga Advisor ke taikhan laga leadership aro commitment para Pughoboto ke MOVCD-NER Phase-IV under te anidiya nimitey dhanyabad janaisey. Tai para farmer khan large-scale(dangor aro bisi) organic farming te shift kuribole laga jarurat thaka te jor dikina koisey ki taikhan laga growth aro market barabole te kheti laga saman khan gari para loijabole laga problem nathaka hoijabo.
Dr. Sukhato A Sema para enaka koisey, “Government tu amikhan laga farmers laga shakti barabole nimitey committed asey. Etu transportation gari logotey, amikhan laga organic bustu khan tu Nagaland laga bhitor aro bahar te bi etu ke kinibole thaka manu khan taak asani para pungchijabo.”
Dr. Sukhato para farmer khan ke faida pungchabole nimitey bana alag-alag government scheme aro initiative khan laga bari te bi janiasey.
Tailaga speech laga ekta important point tu Carbon Credit Programme thakisey
Pughoboto Organic Farmer Producer Company Ltd. para etya 500 registered farmers ke support kuri-asey.
Etu event tu sob farmers khan para organic farming support kuribole commitment kurikina khotom hoisey.
Add Comment