Islamabad, March 15: Pakistan laga military aro Balochistan laga leader para Friday din te India ke Pakistan laga etu southwestern jana(Balochistan) te atangwadi sajish kora laga iljam lagaisey. Etu laga ek-din ageyte, Pakistan laga PM Shehbaz Sharif para chola gobernment para bi New Delhi laga against te enaka ekey iljam lagaisiley.
Hoilebi, taikhan para etu kotha tu hosa sabit kuribole eku specific saboot dibo paranai.
Islamabad te ekta joint press conference te kotha kuwa homoitey, inter-services PR Lt Gen Ahmed Sharif Chaudhry aro Balochistan chief minister Sarfaraz Bugti para koisey ki etu atangwadi hamla khan laga picheyte, Jaffar Express train te recently bomb blast huwa ke include kurikina, India laga Research and Analysis Wing (RAW) tu main poisa invest kora aro plan kora wala asey.
Choudhry para jor dikina koisey ki India tu Pakistan laga against te ekta proxy war kuribole nimitey Afghan territory laga istamal kuriasey aro China-Pakistan Economic Corridor nisna jaruri infrastructure ke target kurisey.
Balochistan laga CM Bugti para military laga kotha logotey agree kurikina koisey ki etu toh ekta “intelligence-driven war’(khufiya jankari paikina kora war) asey kuntu ke foreign power khan para anjam di-asey aro etu laga leader tu India asey. Tai para India ke Pakistan te ban hoikina thaka government laga khilaf te ja aro Jaffar Express attack nimitey blame paikina thaka group Baloch Liberation Army ke hathyar aro poisa diya laga iljam lagaise
Add Comment