Mumbai, March 25: Actor Amy Jackson para Hollywood actor Ed Westwick logotey etu duniya te ekta chokra baccha ke welcome kurisey. Etu mota-maiki para etu khusi laga lhobor announce kuribole nimitey instagram te taikhan laga nutun jonom huwa baccha laga photo share kurisey. Etu post te, Amy para etu bi janaisey ki taikhan laga chokra laga naam tu Oscar Alexander Westwick asey. Amy aro Ed tu August 2024 te shaddi kurisiley.
Etu mota-maiki para duniya ke taikhan laga chokra tu Instagram te ekta black and white photo share kurikina introduce kruisey. First picture te Amy para Oscar ke bukhikina thisey aro Oscar tu tailaga naam thaka blanket para cover hoikina thakisey aro Ed para Amy laga cheek te kiss kurikina thakisey. Second photo te Oscar laga ama-baba duijun bi tailaga chutu haath dhurikina thakisey aro third picture te Amy para tailaga chokra laga forehead te morom para kiss kurikina thakisey. Etu photo khan share kurikina, Amy para caption te enaka likhisey, “Duniya te swagat kuriasey, baby boy. Oscar Alexander Wstwick.”
Amy tu etu ageyte George Panayiotou logotey relationship te thakisey, kun logotey tai 2019 te engage hoisiley. Aro etu ekey saal te taikhan duijun para ekta chokra baccha, Andreas ke jonom disiley. Hoilebi Amy aro George tu 2021 te chara-chari hoisey. Etu picheyte Amy para 2022 te Ed Westwick te date kora suru hoisey aro taikhan duijun 2024 te Italy te ekta romantic ceremony te shaddi kuriloisey. Shaddi hoikina khali dui moina picheyte, etu mota-maiki para pregnancy announce kurisey.
Add Comment