New Delhi, March 26: Indian film censors para internationally positive review paikina thaka film ‘santosh’ ke release hobole para rokhaikina asey. Etu laga reason tu etu film te Indian police force te maiki khan ke bhal para treat nokora, Islam aro Muslim manu khan ke khusi napa aro violence(hinsa) kora laga dikha opor te chinta thaka nimitey asey.
‘Santosh’ film tu British-Indian filmmaker Sandhya Suri para likhisey aro direct kurisey. Etu film tu north India laga setting te banaisey aro etu film te ekta jawan vidwa(mota murija maiki) kun police force join kurkina ekjun chutu Dalit chukri laga murder huwa laga investigate korey, etu laga bari te dikha nimitey dusra desh khan laga tarif paisey. Etu film te Indian police te corruption thaka laga bari te eku bhoi nathakikina himmat para dikhai-asey. Etu film te maiki khan logotey eman na-insafi kora, India laga sobsey chutu caste, Dalits laga khilaf ten a-insafi kora aro police officer khan para biya para treat kora aro torture kora tu normalize kuridiya laga bi dikhai. Etu film para India te sexual violence chola laga mamla, khas kurikina lower caste maiki khan laga against te aro desh te anti-Muslim na-insafi chola laga mamla barithaka logotey bi deal korey.
Santosh film tu sobsey first Cannes film festival te dikhaisiley, kotey etu film ke sob para poson kurisey. Etu film tu Oscar laga international feature cayegory te UK laga official entry thakisey aro BAFTA nimitey Best Debut Feature karney nominate hoisiley. Etu film tu bisi bhal review paisey. Etu film laga main actress Shahana Goswami tu Asian Film Awards te Best Actress jitisiley.
Etu film tu India te banaisiley, etu laga sob actors bi Indian asey aro Hindi language te bana asey. Hoilebi Indian audience khan para etu film ke cinema te sabole naparibo kilemaney Central Bord of Film Certification (CBFC), kunty para cinema te film release kuribole approval diye, etu para Santosh nimitey approval diyanai. Kilemaney etu film te police ke biya dikhai asey.
Sandhya Suri para censor laga etu faisla tu mondukh kruidiya laga asey koisey.
Add Comment