Los Angeles, March 29: US President Donald Trump laga administration para US agency for International Development (USAID) tu formally khotom kuridisey. Aro baki employee(tatey kaam kora mnau khan) ke kaam para olaidibo aro etu agency ke State Department logotey join kruidibo.
Staff khan ke patha ekta notice hisap te, etu faisla para, July 1 para suru kurikina USAID laga baki sob function khan ke State Department logotey purapuri join kruidibo aro independent USAID laga dorkar hataidibo.
Etu notice hisap te, September 2 tak te, USAID laga bisibhak kaam khan tu State Department te transfer hoijabo, nohoile bon hoijabo. Jeremy Lewin koikina poila laga ekta Department of Government Effeciency ( DOGE ) employee para koisey ki etu State Department para kanoon hisap te USAID para independent kaam kora tu khotom kuridibole kuribole plan kuriasey.
Lewin para enaka likhisey ki Congress logotey baat-chit kora picheyte, State Department para USAID laga bisibhak kaam ke takeover kuribole plan kuriasey aro enaka kurikina kanooni tarika para taikhan laga independent para kaam kora tu khotom kuriasey. Kuntu USAID program tu State department te transfer nohoikina continue chulibo etu najanikina asey.
Congress ke patha ekta written message hisap te, USAID te etua khali 900 employees(kaam kora manu) asey, poila te toh 10,000 employee thakisey. USAID te kaam kora staff khan ke kaam para July 1 nohoile September 2 te olaidibo,
Lewin para likhisey ki baki bachikina thaka USAID staff tu USAID laga sampati aro kaam khan bon kuridiya laga kaam ke sabo.
Thursday din te, Donald Trump para bisi agency khan ke union bargaining rights suspend kuridibole order disey.
Etu agency kahn laga list te USAID bi thakisey kilemaney Trump laga administration para etu ke ekta national security agency asey koikina classify kurisey.
Add Comment