International

Myanmar aro Thailand te bisi jur earthquake ahisey, 150 opor manu murisey

12 months ago

Bangkok, March 29: Friday din te Myanmar te ekta bisi jur earthquake ahisey. Etu earthquake para duniya laga sobsey dukhiya desh majotey ekta thaka Myanmar te bisi damage anidisey. Officials khan para warn kurisey ki ahibole thaka din te manu mora laga number tu suru te kuwa(140 opor) para aro bisi baribole nisna asey. Myanmar laga osor te thaka desh Thailand laga capital Bangkok te komsikom 6jun manu murisey, ekta construction chulithaka uccha building girija picheyte. 

Kiman manu murisey, jokhom paisey aro kiman destruction hoisey etu laga pura khobor tu logalog clear thakanai khas kurikina Myanmar te, kotey civil war chuli asey aro information khan ke bisi tight para control kurikina asey. 

Myanmar laga military government, Senior Gen Min Aung Hlaing para TV te tailaga desh te komsikom 144 manu murisey aro 730 manu jokhom khaisey kokina announce kora homoitey koisey ki manu mora aro jokhom kha laga number tu aro uthibole nisna asey. 

Thailand te, Bnagkok laga authorities para koisey ki 6jun manu murisey, 22 manu jokhom khaisey aro 3ta construction chulithaka jaga para 101 manu haraikina asey. Taikhan para manu mora laga number tu Saturday phujur faley revise(update) kurisey. Friday din te taikhan para 10jun manu murisey koisiley hoilebi Saturday te taikhan para koisey ki biya para jokhom khaikina thaka manu khan ke taikhan glti para murijaisey koikina report kurisey. 

Myanmar laga second sobsey dangor seher Mandalay osor te thaka jaga te din faley 7.7 magnitude laga earthquake ahisiley. Etu picheyte aro ekta 6.4 magnitude laga earthquake ahisey.

Myanar tu ekta earthquake ahithaka jaga asey. Hoilebi bisi bhak earthquake tu eman manu nathaka jaga khan te hoi, Friday din te affect huwa seher khan nisna te nohoikina. US Geological Survey, ekta American government science agency para hisap lagaisey ki manu mora laga number tu 1,000 taak pungchibo parey. 

China para tatey ekta 37-member thaka team pathaisey earthquake detectors, drone aro dusra saman khan logotey,  kun khan Myanmar laga Yangon seher te Saturday phujur faley pungchisey.Russia laga emergency ministry para bi duita plane pathaisey kuntu te 120 rescuer aro saman khan thakisey. United Nations para $5 million disey.