International

Ukraine laga President Volodymyr Zelensky US Embassy ke criticize kurise

11 months ago

Ukraine, 05 April 2025: Ukraine laga President Volodymyr Zelensky Saturday din US Embassy ke criticize kurise, juntu Russian missile strike ke “komjor” reaction di dise,  juntu tai laga home city Kryvyi Rig te 18 jon ke murai dise.

Zelensky X te ekta post te missile strike laga footage share kuri kena koise ki Friday din thaka ballistic missile strike te 9 jon baccha aru 11 jon manuh muri she, aru 62 jon jokhom hoise.

Zelensky praise kurise Japan, UK, Switzerland aru Germany laga embassy khan ke juntu solidarity dikhai se, kintu US Embassy laga reaction ke disappoint laga koise.

Tai koise, “Duk laga kotha ase, US Embassy laga reaction toh bisi disappointing ase, etu strong country aru manu, kintu reaction toh bisi komjor ase. Tai itiya bhi ‘Russian’ word pronounce kuribole bhoi khai, juntu laga missile ekta para baccha khan ke murder kurise.”

Zelensky aru koise, “Hoi, war khotom hobo lage. Kintu etu khotom kuribo karone, ami khan hosa kotha bhoi nakuri kena kobole lage. Juntu etu desh war cholai ase aru ceasefire accept nakure. Etu Russia ke pressure dibo lage. Russia ke, juntu baccha khan ke mari bole select korise ceasefire oporte.”

Zelensky laga etu kotha US Ambassador to Ukraine, Bridget Brink, laga post pichhe aah shei. Friday evening te tai likhise, “Bisi dukh lagise jate ekta ballistic missile playground aru restaurant laga osor te bhutishe (Kryvyi Rig). 50 pora beshi manu jokhom hoise aru 16 jon murishe, juntu majot 6 jon baccha ase. Etu war khotom hobo lage.”

Brink, juntu May 2022 pora ambassador ase, Trump office te aahi pichhete social media te Russia ke aggressor ase directly na koi thaki ase.

Zelensky laga post te, tai Russian strike laga devastation dikhai aru US reaction komjor thaka karone notun sanctions Russia opor te demand kurise.

Tai hopeful note te end kuri kena koise, “Ami United States President logot thaka agreement opor bharosha kori ase, tai promise dishe more Patriot system help kuribo. Aru ami duniya laga strength upor bharosha kori ase etu bura, etu war, etu Russian aggression ke overcome kuribo karone.”