Air India para 129 Passengers loikena jaishe

New Delhi: Afghanistan capital Kabul para aji 126 passengers ke AI-244, Air India laga last commercial jaishe koikena khobor para janaishe. Itya Afghanistan te larai hoi thaka nemite ase aro aji rathi New Delhi pongchibo koishe.  Etu airline toh hafta te tin(3) paar Kabul perai thaka ase. Taliban terrorists khan para desh toh pura kapza korikena jai ase koishe. Kabul te jaboli charter flight toh aji olop din akhe te cancelled hoishe, koikena khobor para janaishe. Kabul airspace te military kam kora nemite civilian flights toh besi dukh te ase. Taliban terrorists khan Afghanistan capital Kabul te aji ahishe aro etu samai United States para tai khan laga manuh ke helicopter para othai thakishe aro government minister para koishe ke, power toh interim administration logot thibo. Senior interior ministry official para Reuters logot koishe ke, terrorist khan toh city pithor te jaga sob para ahi ase hoilebi detail khobor toh powa nai. Terrorist group laga spokesman para koishe tai khan government logote Kabul surrender koriboli shanty te kotha koi ase janaishe. “Taliban fighters khan toh itya Kabul entrances te standby te ase aro tai khan ke power toh shanty paboli roki ase,” koikena statement te janaishe. Taliban ke capital Kabul para hataikena 20 saal hoishe  aro etu United States para September 11 din te hamla kora beche ase. Taliban para US-led forces Afghanistan para hata beche olop moina hoishe aro etu samai Afghanistan laga military defences besi beya para kerikena ase.