New Delhi, May 08 : Allu Arjun tu Allu Ramalingaiah laga grandson aro Chiranjeevi laga nephew hobo parey, hoilebi tailaga career laga suru hoithaka homoi tu tai nimitey asaan thakanai. Allu Arjun laga debut(first time film kora) tu 2003 te hoisey, K Raghavendra Rao para direct kora film Gangotri logotey. Tai para reveal kurisey ki kinaka tai suru te tailaga chehra nimitey eman bhal film pai thakanai.
Hyderabad te Sukumar laga Arya film release hoikina 20 years huwa tu celebrate kora laga ekta event te candid hoikina, Allu Arjun para reveal kurisey kinaka tai 2004 laga romantic drama ‘Arya’ te act kuribole monjur nokora tak tailaga career eman bhal thakanai.
Tai para koisey, “Gangotri tu ekta hit film thakisey hoilebi ami eman bhal dikhi thakanai, etu nimitey amilogotey bhal film khan ahi thakanai. Etu film tu ekta blockbuster thakisey hoilebi ekta artist hoikina etu tu amilaga nakamyabi thakisey ki ami para ekta naam banabole paranai. Ami 0 para 100 te uthisey, ami ekta eku nathaka manu thakisey.” Tai para etu bi koisey ki tailaga first film release huwa picheytebi, tai Hyderabad laga RTC crossroads te berai thakisey. Nutun film release huwa aro enaka scripts khan hunikina kuntu te taikey shamil koranai.
Hoilebi etu sob tu titya bodli hoisey jitya tai para tailaga friend aro actor Tarun logotey ek moina picheyte Nithiin laga film ‘Dil’ laga screening attend kurisiley. Tatey Sukumar para taikey ‘Arya’ film nimitey approach kurisiley. Sukumar bi first time film direct kuribole thakisey hoilebi Allu Arjun para tailaga kahani likha tu khusi paisey. Chiranjeevi para bi etu script hunisey aro jitya sob mushkil par kurikina etu film 125 din picheyte theatre te release hoisiley tai Chiranjeevi para bi ekta shield paisey.
Arya film tu ekta bisi dangor hit thakisey aro etu para Allu Arjun aro director Sukumar duijun laga career bi bodli kuridisey.
Allu para koisey Sukumar tu tailaga jibon te ekjun asey kun para taikey ‘Arya’ para ‘Pushpa’ tak pungchaisey.
Add Comment