Itanagar, April 17 : Lok Sabha election nimitey tayari chuli thka majotey, Wednesday(April 17) laga phujur 1 am fale ekta bhitormanu group para ekjun Gram Panchayat Chairman (GPC) ke kidnap kurisey.
Authorities para report kurisey ki Sangam Wangsu (50 years laga), tu BJP laga ekta member asey. Taikey tailaga ghor para bunduk laga nok te kidnap kurisey. Police para kuwa hisap te, taikey kidnap kora laga picheyte ki maksat asey etu te investigation chuli asey.
Etu khobor tu, NSCN-KYA laga ban hoikina thaka bhitormanu para voter khan ke ahibole thaka Assembly election te NPP candidate ke support kuribole dhomki dikina bisi ghonta huwa picheyte ahisey.
Arunachal laga Longding Pumao assembly constituency kuntu tu Arunachal laga bhitormanu khan boha district asey, tatey para report olai asey, ki ekta underground group para voter khan ke ekjun candidate ke support kuribole majboor kuri asey.
Etu bhitormanu khan para tatey laga local manu khan ke bunduk logotey bhoi khilaikina, National People’s Party (NPP) candidate Thangwang Wangham ke vote dibole taikhan laga opor te pressure dhali asey.
Add Comment