Itanagar, March 17 : Election Commission of India(ECI) para Arunachal Pradesh aro Sikkim laga legislative assembly election nimitey election calendar bodli kurikina vote ginti kora laga tarik ke June 4 para bodli kurikina June 2 kuridisey. Etu faisla tu kanoon para compulsory kuridiya tu manikina loisey, kilemaney duita state assembly laga homoi bi June 2 te khotom hobole asey.
India laga constitution laga Article 324, Article 172(1) aro Representation of the People Act, 1951 laga Section 15 under te constitutional obligation laga hawala dikina, ECI para nijor nijor laga assembly terms expire hobole ageyte election conduct kuribole lagiya lagag jarurat tu samjhaisey. Etu laga natija tu, poll body para etu kanooni requirement khan ke support kuribole poila te announce kora election schedule tu modify kurisey.
Etu bodli te, khali assembly election nimitey vote ginti kora laga asey, hoilebi ECI para clarify kurisey ki Arunachal Pradesh aro Sikkim laga parliamentary constituency nimitey etu schedule te eku bodli nathakibo.
ECI para Saturday din te electoral roadmap announce kurisiley, kuntu te Sikkim, Arunachal Pradesh, Odisha aro Andhra Pradesh te hobole thaka assembly polls logotey lamba homoi para hobole rukhi thaka Lok Sabha election bi shamil asey. 543 constituency te hobole thaka parliamentary election tu 7ta phase te hobole asey. April 19 te suru hoikina June 1 te khotom hobole asey.
Lok Sabha nimitey phase hisap te voting kora tu enaka hobole asey : April 19, April 26, May 7, May 13, May 20, May 25 aro June 1. Etu logotey, Arunachal Pradesh aro Sikkim laga assembly election tu April 19 te hobole asey kuntu toh Lok Sabha polling laga first phase logotey coincide kuribole asey. Aro Andhra Pradesh tu May 13 te vote kuribo. Odisha laga assembly poll tu May 13, May 20, May 25 aro June 1 te 4ta phase te hobole asey.
