Assam Lok Sabha Election : Train cancel hoija nimitey 100 opor voter khan vote dhalibole napara hoisey

Guwahati, April 26 : Friday din te 6ta train cancel hoija picheyte Assam te ekso opor passenger kuntu majotey Lok Sabha election te vote dhalibole nimitey jaithaka  manu bisi thakisey, taikhan fasijaisey. Etu train khan cancel huwa tu train track para hati ja laga ghotna huwa nimitey asey. Northeast Frontier Railway para confirm kurisey ki ekta maal bukha train laga engine tu Assam laga Lumding district te Jatinga Lampur aro New Harangajao station majotey train track para hatijaisey.  Aro etu nimitey train laga service khan te badha ahisey. Etu laga natija tu, bisi manu khan laga vote dhalibole laga plan rukhijaisey. Khas kurikina Diphu, Nagaon, Silchar, Karimganj aro Darrang-Udalguri constituency te. Etu te affect huwa manu majotey bisi bhak tu Muslim migrant workers khan thakisey, kun khan Karimganj te vote dhalibole pungchibo paranai. Taikhan tu taikhan laga manjil te pungchibole ageyte 7ta train khotom hoisey. 3ta train para etu badha aha ke accommodate kuribole nimitey taikhan laga schedule rearrange kurisey. Alag alag station te fasikina thaka passenger khan para taikhan laga gusa aro dukh share kurisey. Northeastern Frontier Railway laga Chief Public Relations Officer, Sabyasachi De para train cancel huwa laga khobor confirm kurisey . Hoilebi kiman passenger affect hoisey etu number janaidiyanai. Etu problem para Assam laga Barak Valley fale jai thaka voter khan ke bi affect kurisey. Taikhan laga 9ta train cancel hoisey aro rasta te 7ta train khotom hoijaisey. Sabyasachi De laga hisap te train laga track khan te repair laga kaam tu pani gira aro kaam kora manu laga kami thaka nimitey delay hoijaisey. Politician khan para etu mamla ke loikina chinta uthaisey. Karimganj lagan eta Rashid Ahmed Choudhury para etu mamla tu Election Commission tak pungchabole kosom khaisey.  Etu majotey, fasikina thaka passenger khan ke taikhan jabole thaka jag ate pungchaidibole nimitey Guwahati para bus pathaisey.