Manipur Congress para Outer Manipur constituency te poll violence huwa ke condemn kurisey

Imphal, April 26 : Manipur Pradesh Congress Committee (MPCC) para rajya laga bisi polling station(vote diya jaga) te re-voting kuribole nimitey urgent request submit kurisey. Aro koisey ki etu laga wajah tu Lok Sabha election chuli thaka homoitey bisi gondogol chuli thaka nimitey asey. April 26, 2024 te Manipur laga Chief Electoral Officer ke likha ekta formal letter te, MPCC para EVM machine bhangaidiya, voting booth capture kora, poll te garbari kora aro kunba hathyar bukhikina thaka manu khan para dhomki dikina joborjosti voting kuribole diya  laga ghotna janaisey. II-Outer Manipur Parliamentary Constituency bhitor te thaka 43-Phungyar (ST) Assembly Constituency aro 44-Ukhrul (ST) Assembly Constituency bhitor te 18^th Lok Sabha Election nimitey voting huwa laga ekey din te etu ghotna khan hoisey. MPCC laga hisap te, opor te mention kurikina thaka bisi votig station te biya para badha ahisey. Etu letter te khas kurikina polling station No. 43/19- Shingkap, Shingkap Govt. High School te EVM biya kuridiya aro polling station No. 43/46- Nambashi Khullen, Nambashi Kullen Govt. High School te vote diya jaga capture kora aro vote logotey garbari kora laga ghotna khan highlight kurisey. Etu ghotna khan te, Indian National Congress (INC) lcandidate Shri Alfred Kanngam S. Arthur laga polling agents(voting chuli thaka homoitey te duty te thaka manu khan) ke taikhan laga duty kuribole para rokhaisey. 44-Ukhrul (ST) Assembly te bi enaka ekey ghotna report hoisey. Kotey 3ta vote dhala station, 44/36-Ukhrul(A), Ukhrul Model High School (N/W), 44/41- Ukhrul (D-1), Greenland Primary School aro 44/50- Ukhrul(F), K.K. Leishiphanit Junior High School te EVM machine khan biya kuridisey. Etu opor te, MPCC para dawa kurisey ki 44-Ukhrul (ST) Assembly Constituency laga 17 polling station te bi voting booth kapja kora, vote garbari kora aro joborjosti vote dhalibole diya dikhisey. Etu voting station khan te Leisan Govt. High School, Tushen Govt. High School aro bisi alag alag jag ate. Etu letter te Chief Electoral Officer ke etu garbari khan ke address kuribole aro election laga process ke imandari para hobole dibole nimitey logalog jaruri action lobole request kurisey. MPCC para affect hoikina thaka area khan te re-voting kora nohoilebi fresh polls conduct kuribole request kurisey.