China: India para border te gooli marishe

BEIJING: September 8, 2020. Tuesday din, China para koishe ke, tai khan laga sepia para “countermeasures” loboli olaishe keli koile, Indian sepia khan para Himalayan border crossed korikena gooli marishe. Tuita(2) nuclear-armed desh pithor te June 15 darik Ladakh te laria kora beche relation besi beya hoishe, etu samay Indian sepia khan 20 jun manuh morishe. Beijing’s defence ministry para koishe ke, Monday din te  India military khan western border Line of Actual Control te ahikena Chinese border defence patrol officers khan ke thamki koriboli “gooli” marishe. “Chinese border defence troops khan para situation toh normal koriboli jawab wabas thishe” koikena Western Theater Command of the People’s Liberation Army (PLA) laga spokesperson Zhang Shuili, para janai thishe. Zhang para koishe, India para tuita desh pithor te agreements bonaikena thaka toh beya korishe aro warn korishe ke, tai khan laga kam para ek jun- ek jun majot te meil-melab thaka toh  beya hoijabo. Tai para India laga sepia khan border crossed hoikena thaka toh wabas jabole koishe aro kuan officers khan  para gooli marishe saboli koishe. Tuita(2) side para be 10,000 neshina sepia khan Himalayan boder jamila te ahikena ase, etu chaka laga ocha toh 4,000 metres (13,500 feet) ase koishe. June 15 darik te, 20 jun India sepia mora beche tuita desh laga sepia besi hoikena ase. Etu samay China laga sepia khan be besi jokom paishe hoilebi tai khan para junai deya nai. Jaa hafta te, tutai desh laga Defence ministers khan Moscow te international meeting thakishe aro etu samay tai jun para be ek jun logot botnam korishe.