New Delhi, October 26 : Enforcement Directorate (ED) para Chief Minister Ashok Gehlot laga chokra ke puchtach kuribole nimitey matisey jabki taikhan para Thursday din te Congress president Govind Singh Dotasara laga ghor aro tailogotey jurikina thaka ekta coaching centre ke Rajasthan te assembly election hobole ek hapta agey te raid kuri thakisey.
Etu agency para etu talashi luwa laga details aro etu Chief Minister laga chokra Vaibhav Gehlot ke kuntu tarik te puch tach kuribole asey etu laga jankari tu diyanai. Hoilebi etu mamla laga jankari thaka manu khan para koisey ki Vaibhav Gehlot ke puchtach kuribole nimitey mata tu Foreign Exchange Management Act (FEMA) laga under te jaanch kora laga connection te asey ero etu laga Mumbai te thaka hotel aro resort khan logotey link asey.
Enforcement Directorate para etu jaanch kora laga connection te etu saal laga August aro September moina te Jaipur, Udaipur, Mumbai aro Delhi te raid kurisey. September 1 te ekta bayan diya homoitey te, Enforcement Directorate (ED) para koisey ki FEMA laga under te jaanch suru kora tu Triton Hotels & Resorts Pvt Ltd, Vardha Enterprises Pvt Ltd aro etu khan laga director aro promoter Shiv Shankar Sharma aro Rattan Kant Sharma laga against te kora asey kun khan tu Vaibhav Gehlot laga business partner asey.
Enforcement Directorate (ED) para koisey ki taikhan para etu jaanch suru kora tu Triton Hotels & Resorts Pvt Ltd para Mauritius para ekta dangor kimat te Foreign Direct Investment paisey aro etu tu bar bar repeat kuri thaksiey aro enaka kurikina FEMA laga nyom ke bhangaisey.
ED para September moina te koisey, “Triton Group tu Hawala transaction te shamil thakisey kuntu laga cross-border implication asey.”
Etu agency para koisey ki etu saal laga summer season te taikhan para Rs 1.27 crore hisap kitap nathaka cash paisey, taikhan ke doshi sabit kora laga document logotey digital sabut, hard disk, mobile khan paisey. Kuntu para dikhaisey ki etu hotel nohoilebi company khan para taikhan lag accounts book laga bahar te bi bisi poisa transaction kurisey.
ED para iljam lagaikina koisey ki etu hisap kitap nathaka poisa pa tu hotel khan develop kuribole te invest kurisey.
Ashok Gehlot para ED para tailaga chokra ke puchtach nimitey matta aro Dotasara laga ghor te raid kora tu Congress para Wednesday din te November 25 te hobole thaka election ageyte maiki khan nimitey guarantee khan launch kora logotey link asey. Tai para X(poila te Twitter) te enaka likhisey, ‘ BJP para Rajasthan laga maiki, kisan aro gorib manu khan ke Congress laga guarantee khan para faida pungchibole dibole mon nai.”
Add Comment