New Delhi, October 26 : Bharat Rashtra Samiti (BRS) laga MLA KP Vivekananda aro BJP laga Kuna Srisailam Goud laga majotey TV te live debate(behes) chuli thaka tu joldi hi gondogol te bodli hoijaisey jitya BRS laga MLA KP Vivekananda para etu BJP candidate laga gola dababole kosis kurisey.
Goondagardi kora tu KCR party laga hallmark asey koikina union minister aro Telangana BJP President G Kishan Reddy para online te video share kurikina koisey ki etu Quthbullapur laga BJP MLA para etu ekey jaga para election laribole thaka BJP candidate ke hamla kurisey kilemaney tai para etu BJP candidate para sawal huda laga jawab dibole paranai.
G Kishan Reddy para ekta bayan te koisey ki Vivekanand para Goud laga gola dhurikina hamla kora tu kayar laga kaam asey. Tai para koisey ki police para etu BRS MLA laga against te ekta case register kuribole lagey. Aro enaka nukurisey koiley BJP para kanooni tarika para larayi suru kuribo.
KP Vivekananda tu Quthbullapur jaga laga present MLA asey aro Kuna Srisailam Goud ke tu BJP para hobole thaka election te Vivekananda laga against te election laraibole chunisey.
BJP para agey barikina etu BRS MLA ke elction para disqualify kuridibole demand kurisey aro Election Commission ke tailaga against te action lobole kosiey.
Etu homoitey, BRS spokesperson Sravan Dasoju para koisey ki etu duijun para debate chuli thaka homoitey decency aro shanty banai rakhibole lagiya laga bawajut bi BJP candidate Goud para etu BRS MLA laga baba ke loikina kiba kibi koisey. Tai para koisey Goud para first te etu debate te Vivekanand laga ama baba ke hamla nukuribo lagisey aro etu BRS party laga MLA para bi tailaga dushman ke enaka hamla nukuribo lagisey. “Duijun bi samajdari para kaam kuribole aro taikhan ke pura duniya para sai asey koikina realize kuribole pari thakisey.”
Telangana te Assembly election tu November 30 te hobole asey aro vote laga ginti tu December 3 te hobole asey. Telangana para BRS, Congress aro BJP laga majotey ekta kara competition dikhibole asey.
Add Comment