Guwahati : Radisson Blu Hotel death case

Guwahati, February 06 : Guwahati laga Radisson Blu Hotel te ekta darawana ghotna huwa te, Pune laga ekjun manu tu tailaga phone para intimate photo khan hataidibole kosis kora laga chakar te murijaisey. Guwahati Police Commissioner Diganta Barah para ekta press conference te media ke etu ghotna laga kotha koisey.

Etu ghotna te murija manu, Sanjeev Suresh tu car aro jewelery industry te ekta businessman thakisey. Tai tu ekta dhoka diya lahga jaal te fasisey. Tai para alag alag seher aro Kolkata aro Assam te bi travel kora para taikey Anjali koikina ekjun maiki logotey kismat biya para lok koraidisey . Etu maiki tu Vikas Shaw koikina ekjun manu logotey relation te thaka laga bawajut bi Sanjeev Suresh para tai logotey ekta rishta rakhisey. 

Sanjeev para Anjali logotey tailaga rishta ke aro deep banaidibole lagatar kosis kora laga bawajut bi Anjali tu Vikas Shaw ke imandar(loyal) thakibole laga mon banailoisey. Sanjeev para mondukh hoikina Anjali aro tai para ekey logotey homoi bita laga photo khan Vikas ke pathaikina Vikas aro Anjali laga shadi hobole thaka tu bhangabole kosis kurisey.

Etu photo khan dikhikina, Vikas aro Anjali para Sanjeev ke kotha kurikina etu photo khan ke barbad kuridibole laga plan banaisey. Taikhan laga etu plan ke Guwahati laga Radisson Blu Hotel te anjam disey, kotey Sanjeev aro Anjali para 9^th floor laga ekta room book kurisey. Vikas tu etu hotel laga 10^th floor te room book kurikina thakisey.

Anjali para taikhan laga room laga dorja ke khula rakhikina Vikas ke gusibole aro Sanjeev logotey face to face kotha kuribole disey. Etu picheyte biya para muk laga lagi hoisey, kuntu te Sanjeev tu Vikas laga haath para biya para jokhom khaisey. Suru te Vikas aro Anjali laga plan tu Sanjeev ke khana khelaikina hila hili kuribole napara laga banaidikina photo delete kuribole laga thakisey hoilebi , situation bisi biya hoijaikina Sanjeev murijaisey.

Kanoon para bachibole nimitey, Vikas aro Anjali para polabole kosis kurisey. Aro nopola ageyte hotel staff ke Sanjeev laga halat laga galat tarika para alert kurisey. Hoilebi, taikhan laga plan tu flop hoisey. Kilemaney taikhan ke Police para airport fale jaithaka homoitey dhurisey. Etu picheyte Police para  mujrim Vikas aro Anjali laga saman khan aro taikhan logotey thaka Sanjeev laga phone bi seize kuri loisey.