Guwahati, February 06 : Assam Cabinet minister Pijush Hazarika para koisey ki aro bisi Congress leader khan Bharatiya Janata Party (BJP) join kuribole asey.
Media ke kotha kurikina, Hazarika para koisey ki Congress tu taikhan laga rashta haraisey aro eku aim nathakikina yatey tatey hila hili kuri asey. Tai para koisey ki manu khan tu BJP logotey asey aro etu dikhikina bisi Congress leader khan joldi hi BJP party join kuribole asey.
Olop din ageyte Aam Admi Party (AAP) leader Kamal Medhi BJP join kora laga kotha koikina, Hazarika para koisey ki Medhi tu BJP party para maiki khan laga bhalayi nimitey kaam kora para inspire hoisey. Tai para koisey ki etu safa safi dikhi asey ki BJP tu rajya te maiki khan laga hosla barabole nimitey bisi mehnat kurisey. Aro etu para Kamal Medhi nisna neta khan keagey barikina BJP join kuribole inspire kurisey.
Etu Assam minister para enaka bi koisey ki manu khan logotey Prime Minister Narendra Modi nimitey dangor morom aro izzat thaka tu February 4 te Guwahati te huwa tailaga rally te bisi manu jama huwa para sabit hoisey.
Tai para agey barikina koisey ki bisi manu khan BJP laga rally te ahisey aro etu tu BJP para manu khan laga bhalayi nimitey kaam kora nimitey asey. Hazarika para koisey ki BJP tu etu nimitey bi Assam te bar bar election te success pai asey. Tai para olop din ageyte North Cachar Hills Autonomous Council (NCHAC) election te BJP para jeet hasil kora tu mention kurisey.
Add Comment