Khasi Hills te rathi curfew samai putli hoishe

May 4, 2021. Meghalaya te COVID-19 bemari cases besi  othi-thaka nemite, Monday din East Khasi Hills District Magistrate para district pura te rathi curfew laga samai putli korikena hotai din 8 pm para 5 am dak thakiboli janaishe. Purana order logot olop pulti kora ase aro etu May 4 darik para soruh hobo. COVID-19 bemar pheli thaka rokabo nemite Shillong Urban jaga te sob dukan aro buildings toh May 4 darik para hotai 7 pm te bondh koribo. Etu order te pharmacies & pharmaceutical stores toh puila order neshina kula thakibo. Petrol Pumps toh 10 pm dak kulibo aro home delivery saman toh be 10 pm samai dak thakibo. Monday din te State Home (Political) Department laga order hesab te Shillong Urban jaga te offices neshina (Central, State, Private, Banks, Post Offices) toh hotai din 4:30 PM dak te bondh koriboli janaishe. Offices toh hotai Saturdays din te bondh thakibo. Monday din, Meghalaya te 1 din pithor notun positive cases toh 246 thurishe etu nemite sob melaikena active cases toh 1,884 te othishe. Monday din dak te 177 manuh neshina COVID bemar para bhal hoishe. Meghalaya government para junaishe ke, COVID bemar para mora manuh toh next din 2 pm dak te toh phelaboli koishe.