Kolkata: Opposition khan melikena Prime Minister Narendra Modi logot 2024 Lok Sabha polls te larai koribo nemite West Bengal Chief Minister Mamata Banerjee toh etu moina Delhi te jaikena opposition leaders khan ke lok koriboli bapana kori ase koishe. Banerjee para koishe ke, etu normal visit he ase, hoilebi tai Delhi te visit kora toh 1st samai ase ke tai Assembly polls te kamyaab kora beche opposition te aha general elections nemite tangor kam koriboli ase. State secretariat Nabanna te sawal kora jawab deya te koishe ke, “ami election beche Delhi visit kora nai. Parliament session toh joldi soruh hoboli ase aro etu oper te Covid-19 halat be bhal wala ase, etu nemite ami Monsoon Session samai Delhi te jaikena konuba leaders khan ke lok koribo”. Parliament laga Monsoon Session toh July 19 darik te soruh hoikena August 13 darik te kotom koribo. Tai ke sawal korishe ke Sonia Gandhi aro Rahul Gandhi logot lok paboli nemite, Chief Minister para koishe ke, “ami jaikena (Sonia Gandhi) lok bapo aro konuba dosura leaders khan ke be lok koribo. Ami aro jodi appointment paishe koile Prime Minister Narendra Modi aro President Ram Nath Kovind ke lok koribo. CMO laga khobor hesab te koishe ke, Chief Minister toh Delhi te July 25 darik jaikena tai laga visit toh 4 din extend koriboli pareh. Banerjee laga khobor lowa manuh para koishe ke, tai Sonia Gandhi ke lok kora oper te aro dosura opposition leaders neshina Nationalist Congress Party chief Sharad Pawar, Samajwadi Party chief Akhilesh Yadav aro Aam Aadmi Party chief & Delhi Chief Minister Arvind Kejriwal aro dosura besi jun logot lok koribo. Chief Minister para junai deya toh besi important ase keli koile political strategist Prashant Kishor para Sonia Gandhi aro Rahul Gandhi ke Wednesday din te lok korikena ase, etu oper te Sharad Pawar logot be lok korishe. “itya kotha kuboli toh thik samai nahoi, hoilebi Banerjee para national capital laga halat toh saboli ase. Tai Delhi te visit kora toh hoile keba ekta toh ase,” koikena senior Trinamool Congress leader para janaishe.
Mamata Banerjee aro Sonia lok koribo
