Manipur : CBI para koisey police para lengta berabole diya duijun maiki ke bhir logotey charikina jaijaisey

Guwahati, April 30 : Ekta disturbing video para pura desh ke gusa uthaidikina, ek saal huwa picheyte, Central Bureau of Investigation (CBI) laga ekta charge sheet para Manipur laga Churachandpur district te, duijun Kuki-Zomi maiki khan ke attack kora laga bhayanak detail reveal kurisey.

Indian Express para pa charge sheet te etu detail para janaikina asey ki kinaka etu ghotna huwa homoitey etu duijun maiki para ekta police gari laga modod mangisiley. 

Hoilebi, etu police gari laga driver para taikhan duijun laga modod kuribole mana kuridisey aro koisey ki taikhan logotey chabi nai. Etu picheyte police khan etu gari ke charikina jaijaisey. Etu duijun maiki aro duijun mota ke hamla kora manu khan laga haath te charidisey. 

Juwa saal laga May moina te viral huwa video te ekta bhir para duijun maiki(ekjun 20 years opor aro ekjun 40years opor) ke ekta field fale lengta berabole disey. Etu bhir para taikhan logotey sexual assault bi kurisey. 

CBI laga investigation para reveal kurisey ki etu duijun maiki ke khedaikina ekta group para alag alag kuridiya picheyte gondogol suru hoisey, kun khan first te ekta jungle te lukabole bisarisey. 

Etu charge sheet te agey barikina koisey ki, police driver para chabi haraijaisey kuwa tu misa thakisey. Etu duijun maiki gari bhitor te thaka homoitey, driver para gari toh suru kurisey hoilebi taikhan ke bhir laga osor loijabole nimitey. Jitya ekjun mota victim para modod mangisey, taikey chup koraidisey. 

CBI para janaisey, “Etu bhir para police gari bhitor para ekjun mota aro duijun maiki ke tanikina olaisey . Police khan para etu 3-jun ke bhir logotey charikina etu jaga para jaijaisey. Etu picheyte bhir para etu duijun maiki laga kapra fataisey aro mota victim ke mara suru hoisey. Duijun maiki majotey ekjun maiki para pura ghotna huwa dikhisey.”

CBI para investigation kora picheyte 6jun manu aro ekjun 18 years para komti thaka baccha ke arrest kurisey. Taikhan laga khilaf te charge kora te gangrape, murder aro criminal conspiracy shamil asey. 

CBI para koisey, “Etu charge sheet tu :  Huirem Herodash Meitei (32 years), Arun Khundongbam (31 years), Ningombam Tomba Singh (18 years), Pukhrihongbam Suranjoy Meitei (24 years), Nameirakpam Kiram Meitei(30 years) aro ekjun 18 years para nichey thaka manu laga khilaf te file kurisey. Taikhan sob ke Manipur police para arrest kurisey.”