Manipur CM para 133 sportsperson nimitey government job announce kurisey

Imphal, Febeuary 25 : India aro Manipur nimitey medal aniya 133 sport-persons khan ke rajya laga sarkar para naukri dibole asey.

Etu announcement tu Manipur Chief Minister N Biren Singh para Sunday din te, Imphal laga Khuman Lampak Sports laga Indoor Hall te Players’ Day (Sannaroisingi Numit) observation 2024 laga Chief guest hoikina kotha kurithaka homoitey kurisey. 

Chief Minister N Biren Singh para koisey ki rajya laga sarkar para Naorem Roshibina Devi (Manipur laga Female Wushu player) ke Deputy Superintendent of Police (DSP) laga post offer kurisey. Tai ke India laga President, Droupadi Murmu para January 9, 2024 te Rashtrapati Bhavan te prestigious Arjuna Award 2023 present kurisiley. 

Etu tu tai para sports laga field te mehnat kora nimitey hosla baraidiya laga asey. Tai tu ahibole thaka Olympic games te medal jitibole laga maksat para gusibole kosis kuri asey. 

Naorem Roshibina Devi para 2023 te China laga Hangzhou jag ate huwa 19^th Asian Games te ekta Silver Medal jitisey, 2023 te  USA laga Texas te huwa World Wushu Championship te ekta Silver Medal aro Russia laga Moscow te huwa Moscow Wushu Stars Chamionship te ekta Gold Medal jitisey.

Sports khilari khan laga hosla baraikina, CM para agey barikina announce kurisey ki Gujarat te 36^th National Games aro Goa te 37^th National Games huwa homoitey gold medal jita chokra aro chukri khan ke bi alag alag department te state government job offer kuribo.