Imphal, December 1 : Manipur laga Chief Minister N Biren Singh para Friday din etu sensitive(khatra thaka) border rajya te chuli thaka sob proscribed underground atangwadi khan ke United National Liberation Front (UNLF) para shanty wapas anibole nimitey peace deal sign kora nisna kuribole request kurisey.
CM Biren Singh tu New Delhi para Imphal airport te pungcha picheyte newsmen(khobor diya manu) ke kotha kuri thakisey. Tai tu New Delhi te Wednesday din te centre aro state laga sarkar aro UNLF logotey shanty laga deal sign kora picheyte Union Home Minister Amit Shah aro Defence Minister Rajnath Singh ke milaikina alag central leader khan logotey discussion rakhisey.
Khobor diya manu para CM ke ekta sawas utha te jawab dikina tai para koisey, “Rajya tu etya shanty laga taraf te bari asey. Alag underground group khan tu UNLF para chola peace deal(shanty banaikina rakhibole laga deal) laga style tu nakal kuribo lagey aro taikhan nisna ekey kuribo lagey. UNLF tu Manipur laga plain area te thaka sobsey purana atangwadi group asey.
Center te thaka sarkar para Manipur laga plain area te thaka 9ta underground group ke Unlawful Activities Prevention Act (UAPA) laga under te gairkanooni association declare kurisey.
Etu rajya te 34 recognised thaka community khan asey.
CM nimitey airport aro BJP laga head office te ekta bhal reception function rakhisey.
Etu karney CM para enaka tweet kurisey, “Ami laga colleagues(ekey logotey kaam kora manu), minister aro MLA khan para ami New Delhi te peace talk(shanty laga baat chit) kora picheyte rajya te wapas aha te bisi bhal para swagat kora nimitey dhanyabad janai asey. Shanti anibole laga baat-chit chuli thaka tu successful huwa tu amikhan sob para milikina Manipur laga shanty laga milijulikina thakibole laga bhabisya nimitey kaam kora tu dikhai asey. Shanti aro progress nimitey amikhan milikina kaam kuribo.”
BJP laga mondikina kaam kora workers khan ke Imphal te thaka taikhan laga head office te tailaga swagat bhal para kora nimitey pura mon para dhanyabad janaikina Manipur CM para enaka tweet kurisey, “UNLF logotey shanty laga kotha kurikina ekta bhal momentum ola para ahibole thaka rasta te atmabiswas bhoraidisey. Amikhan laga rajya laga takdeer ke shape kuibole te manu khan laga support eman jaruri asey. Amikhan para ekey logotey milikina Manipur nimitey ekta kamyab thaka bhabisya nimitey kaam kuribo.
Add Comment