Imphal, December 6 : Imphal valley aro etu laga osor thaka district laga bisi area khan te manu khan para voluntary(nijor marji para) bandh rakha para zindigi rukhi jaisey.
Etu bandh tu bisi manu khan para rakhisey aro December 4 te Manipur laga Tengnoupal district te 13 manu ke moraidiya laga against te protest kurikina rakha laga asey.
Imphal valey laga bisi alag alag his ate aro Imphal seher te bi dukan, market, showroom aro school khan bon thakisey. Public khan para nijor marji para bandh rakha nimitey normal life tu affect hoijaisey. Imphal valley laga alava, Manipur laga Bishnupur aro Kakching district bi etu bandh nimitey diktar paisey.
Kuki atangwadi khan para Tengnoupal district laga Leithao busti te moraidiya 13 manu laga antim sanskar tu Imphal East district laga under te thaka Andro constituency laga Torongthel koikina ekta jag ate kurisey.
Eu 13 manu laga antim sanskar tu ekey logotey phujur laga 3:30 am fale kurisey.
Tuesday din laga 6:30pm fale Jawaharlal Nehru Institute of Medical Sciences (JNIMS) para post-mortem kora picheyte etu 13 manu laga dead body tu antim sanskar kora jaga te anisey.
Khobor pa hisap te etu 13 manu laga mot tu titya hoisey jitya kunba Kuki manu khan para Machi police station laga under te thaka Tengnoupal District laga Leithao busti osor te ekta jungle area te achanak para hamla kuridisey.
