Imphal, April 16 : Kuki Inpi Sadar Hills para Sadar Hills te boha taikhan laga Kuki community laga member khan ke ahibole thaka Lok Sabha election te participate nukuribole kosiey.
Kuki Inpi Sadar Hills, kuntu Kuki community nimitey sobsey dangor authority asey, etu para Sadar Hills te boha sob Kuki manu khan ke ahibole thaka Lok Sabha election te vote nidibole request kurikina ekta shaktishali proclamation issue kurisey.
Kuki Inpi Sadar Hills para etu safa safi koisey ki taikhan para Lok Sabha polls ke loikina etu faisla luwa tu voting ban kuribole nohoikina nijor ke vote dhalibole para rokhabole laga asey.
Kuki Inpi Sadar Hills’ Department of Information and Publicity statement para koisey ki 18th Lok Sabha Election te Kuki-Zo community laga ekjun candidate nathaka nimitey, outer Mnaipur PC te thaka 4jun candidate majotey sob laga monjuri para ekjun candidate select kuribole kosis kurisiley, hoilebi sob laga monjuri pabole paranai.
Etu nimitey Kuki Inpi Mnaipur para acknowledge kora sob stakeholders logotey milikina, sob laga monjuri para ahibole thaka election te vote nidibole laga faisla loisey.
II-Outer Manipur Parliamentary Constituency para 4jun candidate asey including BJP para support kora NPF candidate Kachui Timothy Zimik, Congress candidate Alfred Kanngam Arthur aro duijun Independent candidate, S. Kho John aro Dr. Alyson Abonmai.
Sadar Hills Kangpokpi District te 1 lakh opor vote dibole thaka manu asey kun khan April 19 te hobole thaka election laga first phase te vote dhalibole asey. Etu tu Outer Manipur Parliamentary Constituency laga hisa asey.
Kuki Inpi Sadar Hills para bi busti laga sob chief aro Kuki-Zo manu khan ke vote nadhalibole laga joint resolution ke manikina chulibole instruction disey.
Add Comment