Imphal, April 18 : United Kuki National Army (UKNA) para Wednesday din te Manipur Chief Minister aro alag alag quarter para kara condemn kora majotey Imphal-Silchar connect kora NH-37 te Oil aro Gas tanker te hamla kora te taikhan laga haath asey koikina responsibility loisey.
Ekta statement te, UKNA laga Defense Secretary para NH-37 te gari aha juwa kora te bunduk para hamla kora te taikhan laga haath asey koikina zimidari loisey. Aro koisey ki etu hamla tu Meitei community khan laga modod kurikina jaruri saman aro alag hathyar khan supply kora laga khilaf te kora laga asey.
UKNA tu etu hamla te ekjun driver ke jokhom kuridiya nimitey biya lagisey koisey. Aro agey barikina, etu warning disey ki etya para loikina NH-37 te Imphal te saman loija gari khan aha juwa nukuribo lagey.
Etu bhitormanu para enaka offensive operation tu Manipur laga sarkar para juwa 11 moina te manu khan nimitey bisi dangor diktar anidiya nimitey aro Kuki manu khan ke hamla kuribole nimitey moraidibole kafi thaka bomb aro alag hathyar khan check kuribole nimitey suru kurisey koisey.
Ageybarikina taikhan para koisey ki etu operation tu chuli thakibole laga asey. Aro etu order ke neglect kora khan ke Kuki laga dushman nisna treat kuribo. Aro taikhan tu kotha namaniya laga sajai pabo kuntu laga zimidar taikhan nijor hobo.
Etu majotey, Imphal te huwa ekta function laga sideline te news diya manu khan para ekta sawal utha laga jawab dikina, Manipur Chief Minister N Biren Singh para koisey ki NH-37 te hmala kora Kuki atangwadi khan ke dhuribole laga operation suru hoijaisey. Tai para etu militant khan laga harkat ke bi kara para condemn kurisey.
Tamenlong district laga Tousem sub-division under te thaka Tollen Kuki Village aro Kaimai village majotey phujur 10:30 am fale saman bukha gari khan, kuntu te fuel tanker bi asey aro kuntu ke security personnel para rakhwala kurikina loijaithakisey, etu ke Kuki militants khan para guli marikina hamla kurisey. Ekjun driver jokhom khaisey aro 4ta truck barbad hoijaisey.
Alag alag voluntary organization jaiseki Manipur Drivers’ Association (MDA), Youth’s Forum for Protection of Human Rights (YFPHR), Joint Tribes Students’ Association (JTSA) of All Inpui Students’ Union (AISU), Zeme Students’ Organisation, Manipur (ZSOM), Rongmei Naga Students’ Organisation, Manipur (RNSOM) aro Liangmai Naga Kati-mai Ruangdi, Manipur (LNKR-M) para etu ghotna ke kara para condemn kurisey.
Add Comment